O‘zbekistonda so‘nggi kunlarda sodir bo‘lgan yo‘l-transport hodisalari tafsilotini taqdim etamiz.
Namanganda Gentra bilan to‘qnashgan “Jiguli” haydovchisi vafot etdi
Ma’lum qilinishicha, 6-noyabr kuni soat 12:00 larda, 4R–117 To‘raqo‘rg‘on–Namangan–Chortoq–Keskanyor yo‘lining 42 kilometrida, Chortoq tumani “Alisher Navoiy” MFY hududida, Chortoq tumanida yashagan, 1957-yilda tug‘ilgan fuqaro “VAZ-21011” avtomashinasini boshqarib borayotib, harakat xavfsizligini ta’minlay olmagan.
U burilish mumkin bo‘lmagan joydan yo‘lning chap tomoniga burilayotib, qarshisidan harakatlanib kelayotgan, Chortoq tumanida yashovchi, 1985-yilda tug‘ilgan fuqaro boshqaruvidagi Gentra avtomashinasi bilan to‘qnashgan.
Oqibatda “VAZ-21011” avtomashina haydovchisi olgan tan jarohati oqibatida shifoxonada vafot etgan hamda shu avtomashinada bo‘lgan yo‘lovchi, Chortoq tumanida yashovchi, 1958-yilda tug‘ilgan fuqaro chap bo‘yin sohasining lat yeyishi tashxisi bilan tan jarohati olib, shifoxonaga yotqizilgan.
Ushbu holat bo‘yicha Chortoq tuman IIB huzuridagi TB tomonidan 2021-yil 6-noyabr kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Olmaliqda odam urib ketib, qochib ketgan haydovchi topildi
Olmaliq shahri Metallurg ko‘chasining 1-kilometri, 42-uy ro‘parasida noma’lum haydovchi Labo transport vositasini boshqarib ketayotib, piyoda, 1984-yilda tug‘ilgan Q.S.ni urib ketgan va voqea joyidan qochib ketgan. Jabrlanuvchi hodisa oqibatida vafot etgan.
Guvohlar voqea Labo’da sodir etilganini ma’lum qilgan, biroq avtomobilning davlat raqamini aytib berolmagan.
Shundan so‘ng shu hududga yaqin bo‘lgan tuman, shaharlardagi Labo rusumli transport vositalari ro‘yxati shakllantirilib, qidiruv ishlari amalga oshirilgan. Natijada Labo haydovchisi Toshkent viloyati Olmaliq shahrida yashovchi 1990-yilda tug‘ilgan E.H. ekani aniqlangan.
“Kechgacha sexda ishlab, mebel yig‘dik. Qaytib kelayotganimizda yo‘lning o‘rtasida bitta inson chiqib qoldi, olib qochsam menga qarab keldi. U mashinaning o‘ng tarafiga tegdi. Ancha o‘tib ketib, keyin yana qaytib keldim. Yer qon ekan, o‘zim qo‘rqib, ketib qoldim”, — deydi haydovchi.
Holat yuzasidan tergov harakatlari olib borilmoqda.
Yo‘lda teskari harakatlanganlar jazolandi
Ijtimoiy tarmoqda Lacetti avtomobillari haydovchilari o‘zi va o‘zgalarning hayotini xavf ostiga qo‘yib harakatlangani aks etgan videolavha tarqaldi va keng jamoatchilik e’tirozlariga sabab bo‘ldi.
Mazkur video Toshkent shahar IIBB YHXB xodimlari tomonidan o‘rganildi va ushbu haydovchilar aniqlanib, ularga nisbatan tegishli tartibda ma’muriy bayonnomalar rasmiylashtirildi.
“Ushbu videolavha 2021-yil 8-noyabr kuni jamoatchilik vakillari ishtirokida muhokama etilib, bunday holatlarning oldini olish bo‘yicha targ‘ibot ishlari amalga oshirildi”, — deyiladi xabarda.
Mavzuga doir:
Izoh (0)