O‘zLiDeP Buxoro shahar kengashi deputati, Ideal Lift MChJ rahbari Komiljon Qudratov Janubiy Koreyaning Songuo Mobility Innovation Co, LTD kompaniya delegatsiyasi bilan uchrashuvda Buxoroda elektromobil ishlab chiqarish loyihasini yo‘lga qo‘yishni taklif qildi. Bu haqda partiya axborot xizmatiga tayanib, Spot yozmoqda.
Ma’lum bo‘lishicha, loyiha qiymati 1 milliard 210 million dollarga teng, yiliga 30 ming dona elektromobil ishlab chiqarish ko‘zda tutilgan.
“Loyiha barcha maqsadlarni o‘zida mujassam etgan: bu tashqi bozorda respublikaning milliy manfaatlarini himoya qilish, o‘zbek iste’molchilarining manfaatlarini qo‘llab-quvvatlash va yangi 450 dan ziyod ishsiz aholi bandligini ta’minlashdir”, — deya ta’kidlagan Komil Qudratov.
Qayd etilishicha, tomonlar tayyorgarlik ishlarini boshlash, jumladan, yuqori texnologiyali uskunalar yetkazib berish, montaj ishlarini nazorat qilish va chiqarish bo‘yicha kelishuv imzolagan. Loyihani amalga oshirish vaqti oshkor etilmagan.
Bu O‘zbekistonda elektromobil ishlab chiqarish loyihasini amalga oshirish bo‘yicha birinchi harakat emas. 2018-yilning may oyida “O‘zavtosanoat” maxsus guruhi elektromobillar ustida ish olib borayotgani xabar qilingandi. Oradan bir yil o‘tgach, 2019-yilning iyunida “O‘zavtosanoat” strategik rejalashtirish direksiyasi boshlig‘i Rustam Qodirov mamlakatda elektromobil ishlab chiqarishga hali erta ekanini aytgan. 2020-yilda Labo avtomobili elektromobil sifatida xaridorlarga taqdim qilinishi haqida xabar paydo bo‘ldi. 2021-yilning mart oyida esa “O‘zavtosanoat” O‘zbekistonda 2025-yilgacha elektromobillar ishlab chiqarilmasligini ma’lum qildi.
Shunga qaramay, bir qator xorijiy avtokompaniyalar va mahalliy tadbirkorlar tomonidan O‘zbekistonda elektromobil zavodi qurish bo‘yicha takliflar berilgan. Jumladan, 2019-yilda Andijonda 2 milliard so‘mlik elektromobil korxonasi qurilishi haqida xabar berilgan. Mazkur innovatsion korxona 2021-yil 1-iyunda foydalanishga topshirilishi, shu asosda 10 ta yangi ish o‘rni yaratilishi aytilgandi.
Shuningdek, Xitoyning Changan Automobile Group mamlakatda elektromobillar ishlab chiqarishni yo‘lga qo‘yishi, 2025-yilga kelib barcha turdagi 21 modeldagi elektromobillar va 12 ta gibrid modellar ishlab chiqarilishi rejalashtirilayotgani ma’lum qilingan.
Shavkat Mirziyoyev 2019-yilda Farg‘ona viloyatiga tashrifi davomida “Qo‘qon” erkin iqtisodiy zonasidagi “Shaffof omadli sanoat” qo‘shma korxonasi faoliyati bilan tanishgandi va davlat rahbariga narxi 3 ming dollar bo‘lgan elektromobillar namunalari namoyish etilgandi. Keyinchalik viloyatda elektrokarlar 2022-yildan ishlab chiqarilishi va bu uchun zavod qurilayotgani xabar qilingan. Obyektni 2021-yilning noyabrida foydalanishga topshirish rejalashtirilgandi. Ishlab chiqarish quvvati yiliga 30 mingtani tashkil etadi, ishchilar o‘rni — 350 ta.
Bundan tashqari, Farg‘onada Xitoyning Central Asia Motors kompaniyasi bilan birgalikda elektromobillar ishlab chiqarishni yo‘lga qo‘yish rejalashtirilayotgani, dastlabki elektromobillar 2021-yil dekabr oyida test rejimida ishlab chiqarilishi haqida xabar berilgan.
Shuningdek, “Qo‘qon” erkin iqtisodiy zonasida 2022-yildan Xitoyning Silk Road Company kompaniyasi bilan hamkorlikda narxi taxminan 3 ming dollar, tashqi ko‘rinishi Mercedes AMG’ni eslatadigan elektromobillar, 2023-yildan esa Hyundai kompaniyasi bilan hamkorlikda Hyundai Kona elektromobili ishlab chiqarilishi boshlanishi kerak.
2019-yil sentabrida Xitoyning Hebei Good Hope Logistics Development kompaniyasi Angrenda elektromobillar ishlab chiqaruvchi loyihani ishga tushirishi ma’lum bo‘lgandi. Shuningdek, Fiat Chrysler, Henan Suda kompaniyalari ham O‘zbekistonda avtomobil ishlab chiqarishga qiziqish bildirgani haqida xabarlar tarqalgan. 2019-yil avgustida esa Innovatsion rivojlanish vazirligi E-Line Kazakhstan kompaniyasi bilan elektromobillarni ishlab chiqarish borasida o‘zaro hamkorlikda ish olib borishga kelishgandi.
Ma’lumot o‘rnida, O‘zbekiston yanvar—sentabr oylarida 558 ta elektromobil import qilgan.
Izoh (0)