Surxondaryoda bir yil davomida 15 marotaba qoida buzgan haydovchi 17 yoshli o‘smirning hayotiga zomin bo‘ldi

Surxondaryoda yo‘lning qarama-qarshi tomoniga chiqib ketgan shaxs 17 yoshli o‘smirni o‘z uyi oldida urib ketdi. Bu haqda YHXBB xabar qildi.

Ma’lum qilinishicha, 2021-yil 10-iyun kuni Denov tumani “Sebzor” mahallasidan o‘tgan 4R-107 avtomobil yo‘lining 2-kilometrida Damas haydovchisi quvib o‘tish qoidasini buzib, yo‘lning chap tomonida turgan 2004-yilda tug‘ilgan fuqaroni o‘zining yashash uyida urib yuborgan.

Oqibatda jabrlanuvchi olgan tan jarohatlari tufayli shifoxonada vafot etgan.

Aniqlanishicha, Damas haydovchisi haydovchilik guvohnomasi olganiga hali 1 yil bo‘lmagan. Biroq shu muddat ichida haydovchi 15 marotaba qoidabuzarlik sodir etishga ulgurgan.

YTH sabablari aholi vakillari bilan muhokama qilinganidan so‘ng voqea sodir bo‘lgan yo‘lga tezlikni o‘lchovchi moslama – radar o‘rnatilishi ma’lum qilindi.

Qayd etilishicha, Surxondaryo viloyatida 2021-yilning iyun oyiga qadar 128 ta YTH sodir etilishi natijasida 98 nafar fuqaro tan jarohati olgan, 51 kishi esa vafot etgan.

Bundan avval Namanganda Damas urib yuborishi oqibatida 49 yoshli fuqaro vafot etgani, Toshkentda Lacetti haydovchisi qizil chiroqda to‘xtab turgan yuk mashinasiga urilishi oqibatida vafot etgani hamda Toshkentda o‘tgan 5 oyda avtobuslar ishtirokida 35 ta YTH sodir etilgani haqida xabar berilgandi.