O‘zbekistonda so‘nggi kunlarda sodir bo‘lgan yo‘l-transport hodisalari haqida batafsil ma’lumot beramiz.
Beton to‘siqqa urilgan Nexia haydovchisi vafot etdi.
27 yoshli haydovchi boshqaruvidagi Nexia 2021-yil 27-oktabr kuni soat 21:00 lar atrofida Sherobod atrofidan o‘tuvchi M-39 avtomobil yo‘lida Toshkent–Termiz yo‘nalishida harakat qilib, tezlikni me’yoridan oshirish tufayli boshqaruvni yo‘qotgan. Shu sabab yo‘l o‘rtasidagi beton to‘siqqa urilgan.
Oqibatda haydovchi shifoxonada vafot etgan, 45 yoshli yo‘lovchi og‘ir tan jarohati olib shifoxonaga yotqizilgan.
Samarqandda Spark va mototsikl to‘qnashdi.
2021-yilning 3-noyabr kuni Samarqand viloyati Payariq tumani “Ahmad Yassaviy” MFYdan o‘tuvchi 4R-48 Chelak–Metan avtomobil yo‘lining 34-kilometrida Spark avtomobili haydovchisi qarama-qarshi yo‘nalishda harakatlanib kelayotgan mototsiklni o‘tkazib yubormasdan u bilan to‘qnashgan.
Oqibatda mototsikl haydovchisi olgan tan jarohatlari oqibatida Payariq tuman Chelak shahrida joylashgan 1-sonli shifoxonada vafot etgan. Mototsikl yo‘lovchisi esa bosh miyaning og‘ir darajadagi jarohati, ikkala oyoq boldir suyagi yopiq sinishi tashxisi bilan shifoxonaga yotqizilgan.
“Sog‘liq uchun” spirtli ichimlik ichgan haydovchi YTH sodir etdi
Samarqand viloyati bo‘ylab IIB sohaviy xizmatlari tomonidan “Xavfsiz tun” profilaktik tadbirlari o‘tkazildi. Tadbir davomida spirtli ichimlik iste’mol qilgan holda transport vositasi boshqarib yo‘l-transport hodisasi sodir etgan shaxs aniqlandi.
Inspektorning “Qancha ichdingiz?”, degan savoliga “100 gramm, sog‘lik uchun” deya javob bergan haydovchi.
YTH oqibatida jabrlanganlar haqida ma’lumot berilmagan. Avtomobilga jiddiy zarar yetgan.
Parkentda Lada yonib ketdi
2021-yilning 10-noyabr kuni soat 11:55 larda Toshkent viloyati, Parkent tumani, Yangibozor–Parkent–Krasnogorsk avtomobil yo‘lining 38-kilometrida haydovchi, 1974-yilda tug‘ilgan Y.T. boshqaruvidagi Lada avtomobilida yong‘in yuzaga kelgan.
Yong‘in oqibatida tan jarohati olgan fuqarolar yo‘q. Transport vositasiga zarar yetgan.
Mazkur hodisa yuzasidan Parkent tumani FVB hamda YHXB xodimlari tomonidan surishtiruv ishlari olib borilmoqda.
Mavzuga doir:
- Namanganda belgilanmagan joydan qayrilgan haydovchi vafot etdi, Olmaliqda piyodani urib ketgan Labo qochib ketdi. So‘nggi kunlardagi YTHlar tafsiloti
- O‘zbekistonda so‘nggi kunlarda sodir bo‘lgan YTHlar oqibatida 4 kishi vafot etdi. Ularning 2 nafari voyaga yetmagan
- Mashina ichida yonib ketgan haydovchi, eshak arava bilan to‘qnashgan Nexia. O‘zbekiston yo‘llarida sodir bo‘lgan YTH tafsilotlari
Izoh (0)