Сурхондарёда пиёда умрига зомин бўлган ҳайдовчига суд ҳукми ўқилди, Сирдарёдаги ЙТҲда 3 киши жабрланди. ЙТҲ тафсилотлари

Ўзбекистон йўлларида сўнгги кунларда содир бўлган йўл-транспорт ҳодисалари ва уларнинг оқибатлари ҳақида батафсил маълумот берамиз.

Сурхондарёда 17 ёшли йигитнинг умрига зомин бўлган ҳайдовчи 5 йилга озодликдан маҳрум этилди.

Денов тумани «Себзор» маҳалласидан ўтувчи 4Р-107 автомобиль йўлининг 2-километрида 2021 йил 10 июнь куни Damas қувиб ўтиш қоидасини бузган ҳолда тезликни ошириб, бошқарувни йўқотган ва йўлнинг чап томонида, ўз яшаш уйида олдида турган 2004 йилда туғилган Б.К.ни уриб юборган. Оқибатда 17 ёшли фуқаро вафот этган.

Қайд этилишича, Damas ҳайдовчисини гувоҳнома олганига бир йил бўлган, шу вақт ичида 15 марта қоидани бузган. Ҳатто бир марта ИИО ходимининг қонуний талабини ҳам бажармаган, яна йўлда қарама-қарши ҳаракатлангани учун жавобгарликка тортилган.

Судда ҳайдовчи А.А.га нисбатан Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан айбдор деб топилиб, 3 йил муддатга барча турдаги транспорт воситаларини бошқариш ҳуқуқидан маҳрум этилиб, 5 йилга озодликдан маҳрум қилинган.

Сирдарёда Nexia содир этган ЙТҲ оқибатида 3 киши шифохонага ётқизилди.

2021 йилнинг 9 ноябрь куни соат тахминан 18:00 да Сирдарё вилояти ИИБ ЙҲХБ келиб тушган хабарга кўра, Гулистон туманидан ўтган 4К–651 автомобиль йўлининг 18-километрида Nexia руль бошқарувини йўқотиб йўл-транспорт ҳодисаси содир этган.

Оқибатда ҳайдовчи ва 2 нафар йўловчи туман тиббиёт бирлашмасига ётқизилган.