Gruziyaning qamoqdagi sobiq prezidenti Mixail Saakashvili 10-noyabr kuni bo‘lib o‘tadigan sudda ishtirok etishi kerak. Bu haqda siyosatchining advokati Bek Basilay Tbilisi shahar sudi vakiliga tayanib, ma’lum qildi.
“Adliya vazirligi va jazoni ijro etish maxsus xizmati ushbu talabni (Saakashvilini sud zaliga olib kelishni) bajarishga majbur”, — dedi Basilay jurnalistlarga.
Gruziya Adliya vazirligi advokatning sud o‘tkazilish sanasi va joyi haqidagi bayonotiga hozircha izoh bermadi.
Avvalroq mamlakat adliya vaziri Rati Bregadze uning idorasi jarayonni sud zalida emas, qamoqxonada o‘tkazishni tavsiya qilayotganini aytgan. Vazirning so‘zlariga ko‘ra, Adliya vazirligi Saakashvilining xavfsizligi uchun shunday taklif bermoqda.
Saakashvili 29-sentabr kuni Gruziyaga yashirincha kirib kelgan. 1-oktabr kuni u Tbilisida hibsga olingan, shundan so‘ng ochlik e’lon qilgan. Saakashvili Rustavi shahridagi qamoqxonaga joylashtirilgan. U qo‘lga olingandan so‘ng Gruziyada muxolifatchilarning norozilik namoyishlari boshlandi, ular Saakashvili ozod etilishini talab qildi.
Gruziyada siyosatchi bir nechta jinoiy ishlarga aloqador deb topilgan. Ilgari Gruziya rasmiy vakillari Saakashvali chegarani kesib o‘tishi bilan hibsga olinishini bir necha bor ta’kidlagan. Saakashvili o‘zining hibsga olinishini qonunga xilof, unga qo‘yilgan ayblovlarni esa soxtalashtirilgan, deb hisoblaydi.
Mavzuga doir:
- Gruziya Davlat xavfsizlik xizmati Saakashvili davlat to‘ntarishini rejalashtiryapti deb hisoblamoqda
- Saakashvilining advokati ochlik sabab uning xotirasida muammolar paydo bo‘lganini ma’lum qildi
- Gruziya prezidenti hozirda qamoqda saqlanayotgan Saakashvilini hech qachon afv etmasligini ma’lum qildi
- “Misha, biz keldik”. Saakashvilining qaytishi va qamoqqa olinishi qanday qilib Gruziyani ikkiga bo‘lib yubordi?
Izoh (0)