Amerika Federal qidiruv byurosi (FQB) xodimlari AQSh prezidenti Jo Baydenning qizi Eshlining 2020-yil oktabrda o‘g‘irlangan kundaligi yuzasidan Nyu-York va Nyu-Yorkning Uestchester okrugida sud ruxsati bilan tintuv o‘tkazdi. Bu haqda The New York Times gazetasi xabar berdi.
Qayd etilishicha, FQB agentlari tergovni Nyu-York prokuraturasi bilan hamkorlikda olib bormoqda. Tintuvlar Project Veritas guruhining sobiq va hozirgi xodimlarining uylarida o‘tkazilgan. Guruh 2020-yilgi prezidentlik saylovlaridan bir yarim hafta oldin National File veb-saytida Eshli Baydenga tegishli qaydlarning bir qismi nashr etilishida ishtirok etgani aytilmoqda.
Eshli Baydenning shaxsiy kundaligi o‘tgan yilning oktabr oyida yo‘qolgan edi. Unda prezidentning qizi giyohvand moddalarni iste’mol qilishi, muvaffaqiyatsiz nikohlari va “otasi bilan qanday qilib birga dush qabul qilgani” haqida yozgan.
Project Veritas Eshliga tegishli qaydlarning yo‘qolishiga aloqadorligini rad etdi. Guruhning ta’kidlashicha, kundalik ba’zi ma’lumot beruvchilar orqali ularning qo‘liga tushgan. Tashkilot rahbari Jeyms O’Kifning aytishicha, guruh “jumladan, o‘z ishini qonuniy va halol bajarib jinoyat sodir etganlikda gumonlanayotgani uchun” huquq-tartibot organlarining kuzatuv maydonida. Project Veritas AQSh Demokratik partiyasi a’zolari va ilg‘or jamoatchilikni fosh qiluvchi nashrlari bilan tanilgan. Guruhning nishoni CNN va Google bo‘lgan.
Izoh (0)