Gurbanguli Berdimuhamedov o‘g‘liga budjet daromadlarini ko‘paytirishni buyurdi, moliya vaziriga esa hayfsan berdi

Turkmaniston Vazirlar Mahkamasining 5-noyabr kuni bo‘lib o‘tgan yig‘ilishida bosh vazirning iqtisodiyot, bank va xalqaro moliya tashkilotlari masalalari bo‘yicha o‘rinbosari, mamlakat prezidenti Gurbanguli Berdimuhamedovning o‘g‘li Serdar Berdimuhamedov 10 oylik faoliyati yakunlari bo‘yicha ijobiy hisobot taqdim etdi. Bu haqda “Xronika Turkmenistana” xabar qildi.

Bosh vazir o‘rinbosarining hisobotiga ko‘ra, 2021-yil yanvar—oktabr oylarida yalpi ichki mahsulotning o‘sishi 6,2 foizni tashkil etgan, ishlab chiqarish va tovar ayirboshlash, jumladan, tashqi savdo hajmi oshgan. Shuningdek, davlat rahbarining o‘g‘li Turkmaniston mustaqilligining 30 yilligi munosabati bilan ochilishi rejalashtirilgan obyektlar qurilishi haqida ma’lumot bergan.

O‘z navbatida Gurbanguli Berdimuhamedov bosh vazir o‘rinbosariga milliy iqtisodiyot holatini monitoring qilish, mamlakat iqtisodiy rivojlanishining kutilayotgan ko‘rsatkichlari bo‘yicha prognoz qilish, qurilish va neft-gaz majmualari ishchilari bilan uchrashuv o‘tkazish yuzasidan topshiriqlar bergan.

Bundan tashqari Turkmaniston davlat rahbari budjet daromadlarini oshirish, qabul qilingan dasturlarni moliyalashtirishning qo‘shimcha manbalarini izlash, sarmoyalarni jalb qilish hamda davlat xarajatlari hajmi va samaradorligini nazorat qilish choralarini ko‘rish bo‘yicha vazifalarni belgilab olishni buyurgan.

Serdar Berdimuhamedovga barcha bosh vazir o‘rinbosarlari bilan birgalikda ishonchli sarmoyalarga asoslanishi kerak bo‘lgan 2022-yilga mo‘ljallangan mamlakat iqtisodiyotini rivojlantirish dasturini tayyorlash topshirilgan.

“Har bir vazirlik va tarmoq idorasining 2022-yilga mo‘ljallangan aniq ish rejasi bo‘lishi kerak”, — degan katta Berdimuhamedov.

Yig‘ilish yakunida Turkmaniston prezidenti tomonidan moliya va iqtisodiyot vaziri Muhammadgeldi Serdarovga o‘z xizmat vazifalarini lozim darajada bajarmagani va faoliyatida yo‘l qo‘ygan kamchiliklari uchun hayfsan berilgan. Serdar Berdimuhamedov ustidan hech qanday shikoyat bo‘lmagan.

Sentabr oyida davlat rahbari Serdar Berdimuhamedov va Muhammadgeldi Serdarov bilan uchrashib, ularga 2022-yilgi davlat budjeti loyihasini tayyorlash bo‘yicha topshiriq bergandi. Unda import o‘rnini bosuvchi tovarlar hajmini oshirish, elektron mahsulotlar ishlab chiqaruvchi korxonalar tashkil etish va ularni xususiylashtirish kabi vazifalar topshirilgan.

Serdarov so‘nggi marta ogohlantirish tanbehini fevral oyida hukumatning 2020-yildagi faoliyati yakunlariga bag‘ishlangan yig‘ilishida olgan edi. Prezident kredit qarzlarining o‘sishi, valyuta bilan bog‘liq muammolar va Iqtisodiyot vazirligining harakatsizligidan g‘azablangan va o‘g‘liga barcha kamchiliklarni tuzatish uchun yarim yillik oxirigacha muhlat bergan. Agar kutilgan natijaga erishilmasa, uni ishdan bo‘shatishini aytgan.

4-noyabr kuni Turkmaniston prezidenti Gurbanguli Berdimuhamedov savdo majmuasini rivojlantirish bo‘yicha ishchi yig‘ilish o‘tkazgani va unda amaldorlarga qish mavsumida narxlarning oshishiga yo‘l qo‘ymaslikni buyurgani xabar qilingandi.