Америка Федерал қидирув бюроси (ФҚБ) ходимлари АҚШ президенти Жо Байденнинг қизи Эшлининг 2020 йил октябрда ўғирланган кундалиги юзасидан Нью-Йорк ва Нью-Йоркнинг Уэстчестер округида суд рухсати билан тинтув ўтказди. Бу ҳақда The New York Times газетаси хабар берди.
Қайд этилишича, ФҚБ агентлари терговни Нью-Йорк прокуратураси билан ҳамкорликда олиб бормоқда. Тинтувлар Project Veritas гуруҳининг собиқ ва ҳозирги ходимларининг уйларида ўтказилган. Гуруҳ 2020 йилги президентлик сайловларидан бир ярим ҳафта олдин National File веб-сайтида Эшли Байденга тегишли қайдларнинг бир қисми нашр этилишида иштирок этгани айтилмоқда.
Эшли Байденнинг шахсий кундалиги ўтган йилнинг октябрь ойида йўқолган эди. Унда президентнинг қизи гиёҳванд моддаларни истеъмол қилиши, муваффақиятсиз никоҳлари ва «отаси билан қандай қилиб бирга душ қабул қилгани» ҳақида ёзган.
Project Veritas Эшлига тегишли қайдларнинг йўқолишига алоқадорлигини рад этди. Гуруҳнинг таъкидлашича, кундалик баъзи маълумот берувчилар орқали уларнинг қўлига тушган. Ташкилот раҳбари Жеймс O’Кифнинг айтишича, гуруҳ «жумладан, ўз ишини қонуний ва ҳалол бажариб жиноят содир этганликда гумонланаётгани учун» ҳуқуқ-тартибот органларининг кузатув майдонида. Project Veritas АҚШ Демократик партияси аъзолари ва илғор жамоатчиликни фош қилувчи нашрлари билан танилган. Гуруҳнинг нишони CNN ва Google бўлган.
Изоҳ (0)