Berdimuhamedov “Turkmankimyo” rahbari va bosh prokurorga faoliyatidagi sustkashliklar uchun qattiq tanbeh berdi

Turkmanistonda 5-noyabr kuni Vazirlar Mahkamasining 2021-yildagi o‘n oylik faoliyati yakunlariga bag‘ishlangan majlis bo‘lib o‘tdi. Unda Turkmaniston bosh vaziri o‘rinbosari, qurilish-sanoat va energetika kompleksi faoliyatiga rahbarlik qiluvchi Chorimurat Purchekov, sanoat va qurilish ishlab chiqarish vaziri Boymurat Annamammedov, “Turkmankimyo” davlat konserni raisi Niyazli Niyazliyev va boshqalar ma’ruza qildi. “Xronika Turkmenistana” gazetasining Turkmaniston davlat axborot agentligiga tayanib, yozishicha, mutasaddilar o‘ziga qarashli sohalar faoliyati bo‘yicha ijobiy hisobotlarni taqdim etgan.

Turkmaniston prezidenti Gurbanguli Berdimuhamedov qurilish majmuasining ko‘rsatkichlari umuman olganda yomon emasligini, biroq qattiq ishlashda davom etish kerakligini ta’kidlab, 2022-yil uchun yaxshi investitsiya dasturini tayyorlash bo‘yicha topshiriq berdi.

“Qurilish majmuasi talablarini to‘liq qondirish uchun profil sanoatini rivojlantirishni davom ettirish, yangi sex va korxonalar qurish, mavjud ishlab chiqarish quvvatlarini oshirish muhim ahamiyatga ega”, – dedi Turkmaniston rahbari.

Turar joy binolari, ijtimoiy obyektlar, ayniqsa, Axal viloyati ma’muriy markazi qurilishini jadallashtirish uchun ushbu viloyatga mas’ul bo‘lgan bosh vazirning savdo masalalari bo‘yicha o‘rinbosari Chori Gilijov bilan yaqindan hamkorlik qilish topshirildi.

8-oktabr kuni bo‘lib o‘tgan Vazirlar Mahkamasi yig‘ilishida Berdimuhamedov yana bir bor bosh vazir o‘rinbosari Chorimurat Purchekovga “turar joy binolari, aholi punktlari, ayniqsa, Axal viloyati ma’muriy markazi qurilishini jadallashtirish” topshirig‘ini bergandi. Prezident oxirgi marta uning qurilishini 21-oktabr kuni ko‘zdan kechirgan.

So‘ng Turkmaniston prezidenti o‘z xizmat vazifalarini zarur darajada bajarmagani va ishdagi kamchiliklari uchun “Turkmankimyo” rahbari Niyazli Niyazliyev va qurilish sanoati vaziri Boymurat Annamammedovga tanbeh berdi. Ularga mavjud vaziyatni sinchiklab tahlil qilish, mavjud kamchiliklarni qisqa muddatlarda bartaraf etish bo‘yicha barcha zarur choralarni ko‘rish topshirildi.

2018-yilda agrosanoat majmuasi uchun mineral o‘g‘itlar yetarli darajada ishlab chiqarilmagani uchun “Turkmankimyo” rahbariga uchta, jumladan, oxirgi ogohlantirish bilan qattiq tanbeh berilgandi. 2020-yil mart oyida ham u oxirgi ogohlantirish bilan qattiq tanbeh, so‘ng 2021-yil fevralida yana bir qattiq tanbeh olgan.

Vazirlar Mahkamasi yig‘ilishida, shuningdek, bosh vazirning neft-gaz sanoatiga rahbarlik qiluvchi o‘rinbosari Shahim Abdurahmonov sohaning 10 oylik faoliyati bo‘yicha ijobiy hisobotini taqdim etdi.

Gurbanguli Berdimuhamedov bosh vazir o‘rinbosarining hisoboti chog‘ida “Turkmangaz” davlat konserni raisi Botir Amanov, “Turkmenneft” raisi Guychgeldi Baygeldiyev, “Turkmangeologiya” raisi Merdan Ro‘zyev va bosh prokuror Botir Atdayevni chaqirdi.

Turkmaniston rahbari mutasaddilarga yoqilg‘i-energetika kompleksining barcha sanoat tuzilmalarining iqtisodiy ko‘rsatkichlarini oshirish, neft va gaz qazib olish hajmini oshirish, shuningdek, uglevodorodlardan tayyorlanadigan mahsulotlar turini kengaytirish bo‘yicha topshiriqlar berdi.

Shundan so‘ng Berdimuhamedov bosh vazir o‘rinbosari Abdurahmonovga tanbeh berdi, “Turkmangaz” rahbari Amanov hamda bosh prokuror Atdayevga esa so‘nggi ogohlantirish bilan ikkita qattiq tanbeh berdi.

Abdurahmonov va Amanov xizmat vazifalarini zarur darajada bajarmagani, o‘ziga qarashli tarmoq va muassasalar faoliyati ustidan nazoratni susaytirgani, Atdayev neft-gaz kompleksi tuzilmalari faoliyati ustidan prokurorlik nazoratini susaytirgani uchun jazolandi.

Neft va gaz sohasidagi mutasaddilarining hisobotlari nima maqsadda bosh prokuror bilan bog‘langani va “Turkmangaz” korxonalarida korrupsiya yoki o‘g‘irlash holatlari aniqlanganmi yoki yo‘qligiga, Turkmaniston davlat axborot agentligi aniqlik kiritmagan.

Shahim Abdurahmonov 2021-yil fevral oyida bosh vazirning yoqilg‘i-energetika kompleksi masalalari bo‘yicha o‘rinbosari etib tayinlangan edi. “Turkmangaz” rahbari Botir Amanov fevral oyida ham qattiq tanbeh olgan. Bosh prokuror Botir Atdayevga esa avvalgi tanbeh 2019-yilda berilgan.