Бердимуҳамедов «Туркманкимё» раҳбари ва бош прокурорга фаолиятидаги сусткашликлар учун қаттиқ танбеҳ берди

Туркманистонда 5 ноябрь куни Вазирлар Маҳкамасининг 2021 йилдаги ўн ойлик фаолияти якунларига бағишланган мажлис бўлиб ўтди. Унда Туркманистон бош вазири ўринбосари, қурилиш-саноат ва энергетика комплекси фаолиятига раҳбарлик қилувчи Чоримурат Пурчеков, саноат ва қурилиш ишлаб чиқариш вазири Боймурат Аннамаммедов, «Туркманкимё» давлат концерни раиси Ниязли Ниязлиев ва бошқалар маъруза қилди. «Хроника Туркменистана» газетасининг Туркманистон давлат ахборот агентлигига таяниб, ёзишича, мутасаддилар ўзига қарашли соҳалар фаолияти бўйича ижобий ҳисоботларни тақдим этган.

Туркманистон президенти Гурбангули Бердимуҳамедов қурилиш мажмуасининг кўрсаткичлари умуман олганда ёмон эмаслигини, бироқ қаттиқ ишлашда давом этиш кераклигини таъкидлаб, 2022 йил учун яхши инвестиция дастурини тайёрлаш бўйича топшириқ берди.

«Қурилиш мажмуаси талабларини тўлиқ қондириш учун профил саноатини ривожлантиришни давом эттириш, янги цех ва корхоналар қуриш, мавжуд ишлаб чиқариш қувватларини ошириш муҳим аҳамиятга эга», – деди Туркманистон раҳбари.

Турар жой бинолари, ижтимоий объектлар, айниқса, Ахал вилояти маъмурий маркази қурилишини жадаллаштириш учун ушбу вилоятга масъул бўлган бош вазирнинг савдо масалалари бўйича ўринбосари Чори Гилижов билан яқиндан ҳамкорлик қилиш топширилди.

8 октябрь куни бўлиб ўтган Вазирлар Маҳкамаси йиғилишида Бердимуҳамедов яна бир бор бош вазир ўринбосари Чоримурат Пурчековга «турар жой бинолари, аҳоли пунктлари, айниқса, Ахал вилояти маъмурий маркази қурилишини жадаллаштириш» топшириғини берганди. Президент охирги марта унинг қурилишини 21 октябрь куни кўздан кечирган.

Сўнг Туркманистон президенти ўз хизмат вазифаларини зарур даражада бажармагани ва ишдаги камчиликлари учун «Туркманкимё» раҳбари Ниязли Ниязлиев ва қурилиш саноати вазири Боймурат Аннамаммедовга танбеҳ берди. Уларга мавжуд вазиятни синчиклаб таҳлил қилиш, мавжуд камчиликларни қисқа муддатларда бартараф этиш бўйича барча зарур чораларни кўриш топширилди.

2018 йилда агросаноат мажмуаси учун минерал ўғитлар етарли даражада ишлаб чиқарилмагани учун «Туркманкимё» раҳбарига учта, жумладан, охирги огоҳлантириш билан қаттиқ танбеҳ берилганди. 2020 йил март ойида ҳам у охирги огоҳлантириш билан қаттиқ танбеҳ, сўнг 2021 йил февралида яна бир қаттиқ танбеҳ олган.

Вазирлар Маҳкамаси йиғилишида, шунингдек, бош вазирнинг нефть-газ саноатига раҳбарлик қилувчи ўринбосари Шаҳим Абдураҳмонов соҳанинг 10 ойлик фаолияти бўйича ижобий ҳисоботини тақдим этди.

Гурбангули Бердимуҳамедов бош вазир ўринбосарининг ҳисоботи чоғида «Туркмангаз» давлат концерни раиси Ботир Аманов, «Туркменнефть» раиси Гуйчгелди Байгелдиев, «Туркмангеология» раиси Мердан Рўзев ва бош прокурор Ботир Атдаевни чақирди.

Туркманистон раҳбари мутасаддиларга ёқилғи-энергетика комплексининг барча саноат тузилмаларининг иқтисодий кўрсаткичларини ошириш, нефть ва газ қазиб олиш ҳажмини ошириш, шунингдек, углеводородлардан тайёрланадиган маҳсулотлар турини кенгайтириш бўйича топшириқлар берди.

Шундан сўнг Бердимуҳамедов бош вазир ўринбосари Абдураҳмоновга танбеҳ берди, «Туркмангаз» раҳбари Аманов ҳамда бош прокурор Атдаевга эса сўнгги огоҳлантириш билан иккита қаттиқ танбеҳ берди.

Абдураҳмонов ва Аманов хизмат вазифаларини зарур даражада бажармагани, ўзига қарашли тармоқ ва муассасалар фаолияти устидан назоратни сусайтиргани, Атдаев нефть-газ комплекси тузилмалари фаолияти устидан прокурорлик назоратини сусайтиргани учун жазоланди.

Нефть ва газ соҳасидаги мутасаддиларининг ҳисоботлари нима мақсадда бош прокурор билан боғлангани ва «Туркмангаз» корхоналарида коррупция ёки ўғирлаш ҳолатлари аниқланганми ёки йўқлигига, Туркманистон давлат ахборот агентлиги аниқлик киритмаган.

Шаҳим Абдураҳмонов 2021 йил февраль ойида бош вазирнинг ёқилғи-энергетика комплекси масалалари бўйича ўринбосари этиб тайинланган эди. «Туркмангаз» раҳбари Ботир Аманов февраль ойида ҳам қаттиқ танбеҳ олган. Бош прокурор Ботир Атдаевга эса аввалги танбеҳ 2019 йилда берилган.