6-noyabr kuni Prezidentlikka saylangan Shavkat Mirziyoyevning inauguratsiya marosimi bo‘lib o‘tdi. Unda Prezident sifatida qasamyod qabul qilgan Shavkat Mirziyoyev o‘z nutqida Afg‘oniston masalasiga ham to‘xtalib o‘tdi, deb xabar beradi “Daryo” muxbiri.
“Biz pragmatik va chuqur o‘ylangan tashqi siyosat va iqtisodiy diplomatiya borasidagi munosabatlarimizni yanada rivojlantiramiz. Eng avvalo, Markaziy Osiyo mintaqasidagi barcha mamlakatlar bilan yaxshi qo‘shnichilik va strategik sheriklik munosabatlarini tobora kuchaytirish bundan buyon ham asosiy maqsadimiz bo‘ladi”, — deydi Shavkat Mirziyoyev.
Shuningdek, davlat rahbari mintaqaning ajralmas qismi bo‘lgan Afg‘onistonda tinch va osoyishta hayotni tiklash, bu mamlakatda iqtisodiy va gumanitar inqirozga yo‘l qo‘ymaslik uchun afg‘on xalqiga qo‘ldan kelgan barcha yordamni ko‘rsatilishini ma’lum qilgandi.
“Biz Afg‘oniston bilan birgalikda yirik transport-kommunikatsiya loyihalarini amalga oshirishdan manfaatdormiz”, — deya qayd etadi Prezident.
Ta’kidlanishicha, Rossiya, Xitoy, AQSh, Turkiya, Hindiston, Pokiston, Germaniya, Fransiya, Janubiy Koreya, Yaponiya, BAA va dunyoning barcha mintaqalaridagi sheriklar bilan o‘zaro manfaatli va ko‘pqirrali aloqalarni kengaytirishga alohida e’tibor beriladi. BMT va uning ixtisoslashgan tuzilmalari, Parlamentlararo ittifoq, xalqaro moliyaviy institutlar va mintaqaviy tashkilotlar, jumladan, MDH, ShHT, Islom hamkorlik tashkiloti, Turkiy kengash, Iqtisodiy hamkorlik tashkiloti bilan ko‘p tomonlama munosabatlar yangi, amaliy ma’no-mazmun bilan boyitiladi.
“Biz – dunyoga, dunyo – bizga ochiq bo‘lishi kerak. Bugungi hayot, bugungi taraqqiyotning talabi ham aslida shu. Biz ana shu hal qiluvchi tamoyilni, albatta, hayotimiz qoidasiga aylantiramiz”, — deydi Shavkat Mirziyoyev.
Shavkat Mirziyoyev 9-sentabr kuni bo‘lib o‘tgan O‘zLiDePning X qurultoyida “Qo‘shni Afg‘oniston zaminida tinchlik va osoyishtalikni ta’minlashga, jafokash afg‘on xalqiga qo‘limizdan kelgan barcha yordamni ayamaymiz”, — deb aytgandi. Prezident 5-oktabr kuni Turkmaniston prezidenti Gurbanguli Berdimuhamedov bilan muzokaralarda Afg‘oniston xalqiga zarur insonparvarlik yordamini ko‘rsatishni davom ettirishga tayyorligini yana bir bor aytib o‘tgan. Muzokaralarda Afg‘onistonda tinchlik va barqarorlik butun Markaziy Osiyo mintaqasida barqaror taraqqiyot garovi ekani ta’kidlangan.
Mavzuga doir:
Izoh (0)