Shavkat Mirziyoyev: “Chegaralarimiz xavfsizligini yanada mustahkamlaymiz”

Dunyodagi hozirgi murakkab vaziyat, qo‘shni mintaqalardagi ziddiyat va qurolli nizolar O‘zbekistonning xavfsizligi va tinchligini ta’minlashga alohida e’tibor qaratishni taqozo etmoqda. Bu haqda Shavkat Mirziyoyev ayni paytda bo‘lib o‘tayotgan O‘zLiDePning X qurultoyida aytib o‘tdi, deya xabar bermoqda “Daryo” muxbiri.

“Biz o‘tgan davrda yangilangan Mudofaa doktrinasi asosida Qurolli kuchlarimiz faoliyatini tubdan qayta ko‘rib chiqib, takomillashtirmoqdamiz. Qo‘shinlarni tayyorlash va malakasini oshirish tizimini chuqur isloh qildik. Armiyamiz eng zamonaviy qurol-aslaha va harbiy texnika bilan ta’minlanmoqda. Bugun Qurolli kuchlarimiz har qanday tashqi xavf-xatarlarga, turli tajovuz va tahdidlarga qat’iy zarba berishga qodir bo‘lgan yaxlit va ishonchli kuchga aylanmoqda”, — dedi Prezident.

Uning so‘zlariga ko‘ra, kelgusida ham mamlakat mudofaa salohiyati va harbiy qudratini yanada mustahkamlash bo‘yicha aniq va manzilli ishlar davom ettiriladi. Eng avvalo, Qurolli kuchlarning jangovar shayligini, uning imkoniyatlari va qobiliyatini kuchaytirishga qaratilgan dasturlar ishlab chiqilib, tizimli amalga oshiriladi.

“Shu bilan birga, mamlakatimizni havo hujumidan himoya qilish tizimi ham davr talablaridan kelib chiqib, yanada kuchaytiriladi. Chegaralarimiz xavfsizligini zamonaviy kommunikatsiya vositalari va texnik inshootlarni keng qo‘llash orqali yanada mustahkamlaymiz”, — dedi davlat rahbari va harbiy xizmatchilar, ularning oila a’zolarining ijtimoiy himoyasi har tomonlama kuchaytirilishini ham qo‘shimcha qildi.

Shavkat Mirziyoyev Afg‘oniston xalqiga qo‘ldan kelgan barcha yordam berilishini ham ta’kidlab o‘tdi.

“Qo‘shni Afg‘oniston zaminida tinchlik va osoyishtalikni ta’minlashga, jafokash afg‘on xalqiga qo‘limizdan kelgan barcha yordamni ayamaymiz.

Termiz—Mozori Sharif —Kobul—Peshovar  temiryo‘lini qurish hamda energetika, savdo va sanoat sohalaridagi strategik va muhim loyihalarni hamkorlikda, albatta, amalga oshiramiz”, — dedi Prezident.