6 ноябрь куни Президентликка сайланган Шавкат Мирзиёевнинг инаугурация маросими бўлиб ўтди. Унда Президент сифатида қасамёд қабул қилган Шавкат Мирзиёев ўз нутқида Афғонистон масаласига ҳам тўхталиб ўтди, деб хабар беради «Дарё» мухбири.
«Биз прагматик ва чуқур ўйланган ташқи сиёсат ва иқтисодий дипломатия борасидаги муносабатларимизни янада ривожлантирамиз. Энг аввало, Марказий Осиё минтақасидаги барча мамлакатлар билан яхши қўшничилик ва стратегик шериклик муносабатларини тобора кучайтириш бундан буён ҳам асосий мақсадимиз бўлади», — дейди Шавкат Мирзиёев.
Шунингдек, давлат раҳбари минтақанинг ажралмас қисми бўлган Афғонистонда тинч ва осойишта ҳаётни тиклаш, бу мамлакатда иқтисодий ва гуманитар инқирозга йўл қўймаслик учун афғон халқига қўлдан келган барча ёрдамни кўрсатилишини маълум қилганди.
«Биз Афғонистон билан биргаликда йирик транспорт-коммуникация лойиҳаларини амалга оширишдан манфаатдормиз», — дея қайд этади Президент.
Таъкидланишича, Россия, Хитой, АҚШ, Туркия, Ҳиндистон, Покистон, Германия, Франция, Жанубий Корея, Япония, БАА ва дунёнинг барча минтақаларидаги шериклар билан ўзаро манфаатли ва кўпқиррали алоқаларни кенгайтиришга алоҳида эътибор берилади. БМТ ва унинг ихтисослашган тузилмалари, Парламентлараро иттифоқ, халқаро молиявий институтлар ва минтақавий ташкилотлар, жумладан, МДҲ, ШҲТ, Ислом ҳамкорлик ташкилоти, Туркий кенгаш, Иқтисодий ҳамкорлик ташкилоти билан кўп томонлама муносабатлар янги, амалий маъно-мазмун билан бойитилади.
«Биз – дунёга, дунё – бизга очиқ бўлиши керак. Бугунги ҳаёт, бугунги тараққиётнинг талаби ҳам аслида шу. Биз ана шу ҳал қилувчи тамойилни, албатта, ҳаётимиз қоидасига айлантирамиз», — дейди Шавкат Мирзиёев.
Шавкат Мирзиёев 9 сентябрь куни бўлиб ўтган ЎзЛиДеПнинг Х қурултойида «Қўшни Афғонистон заминида тинчлик ва осойишталикни таъминлашга, жафокаш афғон халқига қўлимиздан келган барча ёрдамни аямаймиз», — деб айтганди. Президент 5 октябрь куни Туркманистон президенти Гурбангули Бердимуҳамедов билан музокараларда Афғонистон халқига зарур инсонпарварлик ёрдамини кўрсатишни давом эттиришга тайёрлигини яна бир бор айтиб ўтган. Музокараларда Афғонистонда тинчлик ва барқарорлик бутун Марказий Осиё минтақасида барқарор тараққиёт гарови экани таъкидланган.
Изоҳ (0)