“Barselona” Xavining bosh murabbiy etib tayinlanganini e’lon qildi.
Kataloniyaliklar matbuot xizmati xabariga ko‘ra, klub 41 yoshli mutaxassis bilan 2024-yilgacha mo‘ljallangan shartnoma imzolagan.
Xavi ushbu dam olish kunlarida Barselonaga uchib kelishi kutilmoqda, 8-noyabr, dushanba kuni esa u jamoa bosh murabbiyi sifatida tanishtiriladi.
Avvalroq “As-Sadd” Xavini tovon puli evaziga qo‘yib yuborishini ma’lum qilgandi. Biroq keyinchalik 5 million yevro miqdoridagi kompensatsiyani “Barselona” to‘lamoqchi emasligi va bu summani Xavining o‘zi to‘lagani aytildi.
Ma’lumot uchun, Xavi 1998-yildan 2015-yilga qadar “Barselona” sharafini himoya qilgan. Futbolchilik faoliyati davomida katalonlar bilan 25 ta sovrin qo‘lga kiritgan. 2015-yilda Xavi “As-Sadd” jamoasiga borib qo‘shilgan. 2019-yilda futbolchilik faoliyatini yakunladi va Qatar klubida murabbiylik qila boshladi. Xavi “As-Sadd” bilan murabbiy sifatida 7 ta sovrinni qo‘lga kiritdi.
“Barselona” 28-oktabr kuni “Rayo Valyekano”ga 0:1 hisobida mag‘lub bo‘lganidan so‘ng Ronald Kumanni iste’foga chiqargandi. Hozirda “ko‘k-anorranglilar”ni “Barselona B” murabbiyi Serxi Barxuan vaqtinchalik boshqarib turibdi.
Jamoa La Ligada 11 o‘yinda 16 ochko jamg‘arib, 9-o‘rinni egallab turibdi. Chempionlar Ligasida esa 4 turdan so‘ng 6 ochko bilan 2-o‘rinda bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)