APL. Manchester derbisi, Antonio Konte boshchiligidagi “Tottenhem” ligadagi birinchi o‘yinini o‘tkazadi, “Liverpul” “Vest Hem” mehmoni bo‘ladi
“Manchester Yunayted” — “Manchester Siti”, 6-noyabr, 17:30
“Manchester Yunayted” APLda 15 ochko bilan 5-o‘rinda bormoqda. Ole-Gunnar Sulsher shogirdlari 10-turda “Tottenhem” bilan bahs olib bordi va 3:0 hisobida g‘alaba qozondi. Bu esa norvegiyalik mutaxassisning jamoada qolishini ta’minladi. “Shporlar”ga qarshi o‘yinga qadar mankunianliklar APLdagi ketma-ket 4 ta o‘yinda g‘alaba qozona olmagandi.
“Manchester Siti” esa 20 ochko bilan 3-o‘rinni egallab turibdi. Pep Gvardiola jamoasi 10-turda “Kristal Pelas”ga (0:2) mag‘lub bo‘ldi. “Shaharliklar” Chempionlar Ligasida ham pley-off yo‘llanmasini deyarli hal qildi.
Manchester derbisidagi oxirgi besh o‘yinda “Manchester Yunayted” 3 marta, “Manchester Siti” 1 marotaba g‘alaba qozongan. Bitta o‘yin durang natija bilan yakunlangan.
Qolgan uchrashuvlar:
6-noyabr, shanba
“Brentford” — “Norvich”, 20:00
“Chelsi” — “Byornli”, 20:00
“Kristal Pelas” — “Vulverhempton”, 20:00
“Brayton” — “Nyukasl”, 22:30
7-noyabr
“Arsenal” — “Uotford”, 19:00
“Everton” — “Tottenhem”, 19:00
“Lids” — “Lester”, 19:00
“Vest Hem” — “Liverpul”, 21:30
La Liga. “Barselona” “Selta”ga qarshi, “Real” kichik Madrid derbisida ishtirok etadi, “Valensiya” o‘z uyida “Atletiko”ni qabul qiladi
“Selta” — “Barselona”, 6-noyabr, 20:15
Oxirgi yillarda Vigo jamoasi o‘rtamiyona jamoadan yuqoriroq natijalar ko‘rsatishga urinmoqda. O‘tgan mavsumda “Selta” chempionatni 8-o‘rinda yakunladi. Ushbu mavsumda esa ishlar unchalik yurishmayapti. 11 ochko bilan 15-o‘rinda borayotgan jamoa yuqoriroq o‘rinlarga chiqishga harakat qiladi. Kataloniyaliklarga qarshi o‘yin “Selta” uchun doim muhim ahamiyat kasb etgan.
“Barselona” ushbu mavsumda noodatiy vaziyatga tushib qoldi. Klub bir chuqurlikka tushib ketdi va undan hech qanaqasiga chiqishning iloji yo‘qdek tuyulmoqda. Avvaliga Lionel Messi jamoani tark etdi, keyin Aguero, Dembele, Breytueyt kabi futbolchilarning jarohatlanishi jamoa uchun kutilmagan bo‘ldi. Undan tashqari bosh murabbiy Ronald Kuman manziliga juda ko‘p tanqidlar yog‘ila boshladi. Rahbariyat uni iste’foga chiqarishdan boshqa yo‘l topa olmadi. Uning o‘rniga vaqtinchalik murabbiy etib tayinlangan Serxi Barxuan qo‘l ostida kataloniyaliklar oxirgi turda “Alaves” bilan 1:1 hisobida durang qayd etdi.
Jamoalarning oxirgi 5 o‘yinida ikki marta “Barselona”, ikki marta “Selta” g‘alaba qozongan. Bitta o‘yinda durang natija qayd etilgan.
“Real” — “Rayo Valyekano”, 6-noyabr, 20:15
“Real” mavsum avvalida La Liga yetakchisi edi. Ammo oktabr oyida bir nechta omadsiz uchrashuv sabab ikkinchi o‘ringa tushib qoldi. Endi “Real Sosyedad” birinchi o‘rinda. Faqatgina bir ochko farq bilan ortda borayotgan “Real” yetakchilik uchun kurashni davom ettiradi. “Qaymoqranglilar” parallel ravishda Chempionlar Ligasida ham kurashmoqda va oxirgi 2 turda Donetskning “Shaxtyor”ini ikki marta mag‘lub etdi, chempionatda esa “Elche” ustidan kichik hisobda g‘alabaga erishdi. Karim Benzema va Vinisius yaxshi formada, ular deyarli har o‘yinda gol urib kelmoqda.
“Rayo Valyekano” esa ushbu mavsumda juda ko‘p “syurpriz”lar taqdim etyapti. Jamoa La Liganing 6-o‘rniga chiqib oldi. Ortda qolgan 12 turda madridliklar 6 ta g‘alaba qayd etdi va 18 ta gol urdi. Hozircha ularning eng ulkan natijasi “Barselona” ustidan 1:0 hisobidagi sensatsion g‘alaba bo‘lib turibdi.
Qolgan uchrashuvlar:
6-noyabr, shanba
“Espanyol” — “Granada”, 18:00
“Alaves” — “Levante”, 22:30
7-noyabr, yakshanba
“Vilyarreal” — “Xetafe”, 18:00
“Valensiya” — “Atletiko Madrid”, 20:15
“Malyorka” — “Elche”, 22:30
“Osasuna” — “Real Sosyedad”, 22:30
“Betis” — “Sevilya”, 01:00
A Seriya. Milan derbisi, “Napoli” “Verona”ni sinovdan o‘tkazadi, “Yuventus” Turinda “Fiorentina”ni qabul qiladi
“Milan” — “Inter”, 7-noyabr, 00:45
“Milan” Italiya chempionati “Napoli” bilan birga yetakchilik qilmoqda. Har ikkala jamoada ham 11 turdan so‘ng 31 ochko mavjud. Stefano Pioli shogirdlari hozircha chempionatda mag‘lubiyatga uchragani yo‘q. 11 ta o‘yindan 10 tasida g‘alaba qozondi va bitta durang natija qayd etdi. A Seriyada ishlari yaxshi ketayotgan “rossonerilar” Chempionlar Ligasida omadsizlikka uchrayapti. “Qizil-qoralar” o‘z guruhida oxirgi o‘rinni egallab turibdi.
“Inter” esa yetakchilarni o‘zidan uzoqlashtirib yubormaslikka intilmoqda. Birinchi va ikkinchi o‘rindagi jamoalardan 7 ochko kam jamg‘argan “nerazzurilar” oxirgi vaqtlarda muxlislarni xursand qila olyapti. “Udineze” va “Empoli”ni bir xil: 2:0 hisobida yengdi, “Yuventus” bilan 1:1 hisobida durang natija qayd etdi, undan tashqari Chempionlar Ligasida “Sheriff”ni 3:1 hisobida taslim etdi. “Inter” bir necha yil deganda YChL pley-off bosqichiga chiqish imkoniga ega bo‘lmoqda.
Qolgan uchrashuvlar:
6-noyabr, shanba
“Spetsiya” — “Torino”, 19:00
“Yuventus” — “Fiorentina”, 22:00
“Kalyari” — “Atalanta”, 00:45
7-noyabr, yakshanba
“Venetsiya” — “Roma”, 16:30
“Sampdoriya” — “Bolonya”, 19:00
“Udineze” — “Sassuolo”, 19:00
“Latsio” — “Salernitana”, 22:00
“Napoli” — “Verona”, 22:00
Bundesliga. “Leypsig” o‘z uyida “Borussiya D”ni qabul qiladi, “Bavariya” “Frayburg”ni chig‘iriqdan o‘tkazadi
“Bavariya” — “Frayburg”, 6-noyabr, 19:30
Bundesligada Yulian Nagelmann shogirdlarining ishlari u darajada yaxshi emas, shunday bo‘lsa-da myunxenliklar 10 turdan so‘ng 25 ochko bilan chempionatda yetakchilik qilmoqda. Undan keyingi o‘rinda turgan “Borussiya D” hisobida esa 24 ochko mavjud.
O‘tgan turda “Bavariya” “Union Berlin”ni 5:2 hisobida taslim etdi va avvalroq Germaniya Kubogida “Borussiya M”ga 0:5 hisobida mag‘lub bo‘lgani oz bo‘lsa-da unutildi. Chempionlar Ligasida esa myunxenliklar E guruhida yetakchilik qilmoqda. 4 ta o‘yinning barchasida g‘alaba qozongan nemislar pley-off yo‘llanmasini muddatidan avval hal qildi.
“Frayburg” 22 ochko bilan musobaqa jadvalining 3-o‘rinidan joy olgan. Hozircha jamoa chempionatda mag‘lubiyat nimaligini bilgani yo‘q. 10 ta o‘yinning 6 tasida g‘alaba qozongan bo‘lsa, 4 tasi durang natija bilan yakunlangan. Undan tashqari “Frayburg” so‘nggi bor mehmonda o‘tgan mavsum oxirida mag‘lub bo‘lgan edi. Ushbu mavsumda esa mehmonda 3 ta g‘alaba va 2 ta durang natija qayd etgan.
Qolgan uchrashuvlar:
6-noyabr, shanba
“Boxum” — “Hoffenhaym”, 19:30
“Shtutgart” — “Arminiya”, 19:30
“Volfsburg” — “Augsburg”, 19:30
“Leypsig” — “Borussiya D”, 22:30
7-noyabr, yakshanba
“Herta” — “Bayer”, 19:30
“Kyoln” — “Union Berlin”, 21:30
“Groyter” — “Ayntraxt”, 23:30
Liga 1. “PSJ” “Bordo”ga qarshi, “Nitssa” “Monpelye” bilan kurash olib boradi
“Bordo” — “PSJ”, 6-noyabr, 01:00
“Bordo” o‘zining buyuk tarixini tiklashga urinmoqda. Shu maqsadda Vladimir Petkovich bosh murabbiy sifatida olib kelingan. Lekin hozircha jamoa kutilgan natijalarni oqlamayapti. Bordo jamoasi Fransiya chempionatida 12 ochko bilan 16-o‘rinda bormoqda.
“PSJ” yozda juda ko‘p yulduzlarni jamoaga taklif qilganidan so‘ng, tabiiyki, ulardan barcha musobaqalarda g‘alaba qozonish talab etiladi. Chempionlar Ligasida ishlari yaxshi ketayotgan parijliklar Liga 1 da 31 ochko bilan musobaqa yetakchisi bo‘lib turibdi. Parij yulduzi bo‘lib turgan Lionel Messi Fransiya chempionatida birorta golli vaziyatda ishtirok etgani yo‘q. Jarohat tufayli argentinalik futbolchining “Bordo”ga qarshi uchrashuvda ishtirok etmaydi.
Qolgan uchrashuvlar:
6-noyabr, shanba
“Lill” — “Anjer”, 21:00
7-noyabr, yakshanba
“Marsel” — “Mets”, 17:00
“Loryan” — “Brest”, 19:00
“Nant” — “Strasbur”, 19:00
“Reyms” — “Monako”, 19:00
“Sent-Etyen” — “Klermon”, 19:00
“Nitssa” — “Monpelye”, 21:00
“Renn” — “Lion”, 00:45
Ma’rufjon Ochilov tayyorladi
Izoh (0)