Gruziya prezidenti Salome Zurabishvili mamlakatning sobiq prezidenti Mixail Saakashvilini hech qachon afv etmasligi va ushbu masalani boshqa muhokama qilishni niyatida emasligini ma’lum qildi, deb xabar beradi “TASS”.
“Sobiq prezidentni (Saakashvili — tahr.) afv etish borasidagi pozitsiyam aniq va o‘zgarmas — yo‘q va hech qachon. Ushbu masalaga boshqa hech qachon qaytmayman”, — deydi Zurabishvili.
Shuningdek, u Saakashvilini siyosiy mahbus deb hisoblamasligini ta’kidlagan. “Sobiq prezident na siyosiy mahbusning, na begunoh qurbonning mezonlarga javob beradi. U mamlakatga o‘z xohishi bilan va noqonuniy yo‘l orqali keldi. Uning kelishidan maqsadi vaziyatni izdan chiqarish”, — deydi davlat rahbari.
Shu bilan birga, u Adliya vazirligini Saakashvilining ahvoli yomonlashishi mamlakatda spekulyatsiya va vaziyatni izdan chiqarishga sabab bo‘lmasligi uchun uni “muhim mahbus” deya hisoblab, sog‘lig‘i haqida qayg‘urishga chaqirgan.
Eslatib o‘tamiz, 1-oktabr kuni Mixail Saakashvili sakkiz yildan buyon birinchi marta Gruziyaga keldi. U chegarani noqonuniy kesib o‘tganlik ayblovi bilan qo‘lga olindi. Shundan keyin Gruziyada muxolifat norozilik namoyishlari boshlandi, ular Saakashvili ozod etilishini talab qildi. Hozir u Rustavi shahridagi qamoqxonada, u yerda o‘zini siyosiy mahbus deb hisoblagani uchun ochlik e’lon qilgan.
Gruziya Adliya vazirligi sobiq prezidentni qamoqxona kasalxonasiga yotqizishni bir necha bor taklif qilgan, biroq Saakashvili va uning advokatlari bunga mutlaqo qarshi. Ular Gruziyaning sobiq rahbarini xususiy fuqarolik klinikasiga olib borishni talab qilmoqda.
Izoh (0)