Toshkentda Senatning yangi binosi joylashgan ko‘chadan o‘tuvchi 10 ta avtobus vaqtincha o‘z yo‘nalishini o‘zgartiradi

Toshkentda Senatning yangi binosi joylashgan ko‘chadan o‘tuvchi 10 ta avtobus 3-noyabrdan  4-noyabr soat 11:00 ga qadar o‘z yo‘nalishini o‘zgartiradi. Bu haqda “Toshshahartransxizmat” matbuot xizmati xabar berdi.

Ma’lum qilinishicha, Toshkentdagi Islom Karimov ko‘chasining Sharof Rashidov ko‘chasi kesishmasidan Amir Temur shohko‘chasi kesishmasigacha bo‘lgan qismida yo‘l ta’mirlash ishlari olib borilayotgani sababli, 3-noyabrdan  4-noyabr soat 11:00 ga qadar transport harakati uchun yopiladi.

Shu munosabat bilan, 1, 13, 19, 21, 22, 30, 37, 51, 67, 85-sonli avtobus yo‘nalishlari suratdagi ko‘chalardan harakatini davom ettiradi.

Eslatib o‘tamiz, Toshkent shahridagi Islom Karimov ko‘chasining bir qismi bir necha kun ketma-ket tig‘iz vaqtda ogohlantirishsiz yopib qo‘yilayotgan edi. Buning oqibatida bir necha kun Markaziy univermag (SUM), Alisher Navoiy nomidagi Davlat akademik katta teatri, Senatning yangi binosi va Beeline ofisi yaqinida kunning tig‘iz vaqtida katta tirbandlik yuzaga keldi.

Shundan so‘ng Toshkent shahar hokimligi ushbu ko‘chaning bir qismi yopilishi haqida rasmiy xabar berdi. Unda yo‘l ta’mirlash va obodonlashtirish ishlari olib borilishi munosabati bilan 3-noyabr kuni soat 00:00 dan 4-noyabr kuni soat 11:00 ga qadar Islom Karimov ko‘chasining Sharof Rashidov ko‘chasi kesishmasidan Amir Temur shohko‘chasi kesishmasigacha bo‘lgan qismi transport harakatlanishi uchun yopilishi ma’lum qilinib, haydovchilardan aylanma yo‘llardan foydalanishlari tavsiya qilingan va yuzaga kelgan noqulaylik uchun uzr so‘ralgan.