Namanganda 2021-yilning 9 oyi davomida sudlanganlarning 720 nafari yoki 26,1 foizini takroran jinoyatga qo‘l urgan shaxslar tashkil etdi. Bu haqda viloyat sudi raisi Abdurasul Eranov ma’lum qildi, deya xabar beradi “Daryo” muxbiri Azizbek Abduvaliyev.
Viloyatda mazkur muddat davomida birinchi instansiya sudlari tomonidan 3668 nafar shaxsga nisbatan 2801 ta jinoyat ishi ko‘rib chiqilgan. O‘tgan yilning shu davriga nisbatan taqqoslaganda sudlangan shaxslar soni 89,4 foizga yoki 1303 nafarga, jinoyat ishlari soni esa 80,9 foizga yoki 1253 taga ortgan.
“Sudda ko‘rib chiqilgan ishlarni tahlil qilganda viloyatda o‘g‘rilik, firibgarlik, harakat xavfsizligi qoidalarini buzish, qasddan badanga shikast yetkazish, bezorilik, hujjatlarni soxtalashtirish va o‘zlashtirish kabi jinoyatlar ko‘payganini qayd etish mumkin”, — deydi Abdurasul Eranov.
Viloyat sudi raisining bildirishicha, joriy yil fevral oyida Jinoyat-protsessual kodeksiga yangi norma kiritilib, o‘ziga nisbatan qo‘yilgan gumon yoki ayblovga rozi bo‘lgan, jinoyatning ochilishida faol ko‘maklashgan va keltirilgan zararni bartaraf etgan shaxsning prokuror bilan ijtimoiy xavfi katta bo‘lmagan, uncha og‘ir bo‘lmagan va og‘ir jinoyatlar bo‘yicha kelishuv turi joriy etildi.
Ushbu normaga muvofiq, viloyatda sudlar tomonidan 2021-yil 9 oyi davomida 17 nafar shaxsga nisbatan 15 ta jinoyat ishi bo‘yicha sudlanuvchilarni tergov davrida prokuror bilan tuzgan kelishuvlari tasdiqlanib, ularga nisbatan ayblangan modda sanksiyasida ko‘zda tutilgan eng ko‘p jazoning yarmidan oshmagan jazo tayinlangan.
Izoh (0)