Marg‘ilon shahar xalq ta’limi bo‘limi sobiq boshlig‘i 1,7 mlrd so‘mni talon-toroj qilgani aniqlandi

Marg‘ilon shahar Xalq ta’limi bo‘limi boshlig‘i ta’lim tizimini muntazam ravishda tanqid qilgani sabab unga nisbatan jinoyat ishi qo‘zg‘atilib, qamoqqa olingani haqida videoxabarlar tarqaldi. Bosh prokuratura axborot xizmati rahbari Hayot Shamsutdinov holat yuzasidan rasmiy ma’lumot berdi.

Aniqlanishicha, Marg‘ilon shahar prokuraturasi tomonidan shahar Xalq ta’limi bo‘limi mansabdor shaxslariga nisbatan qo‘zg‘atilgan jinoyat ishi yuzasidan tergov harakatlari olib borilmoqda.

Tergovda Marg‘ilon shahar xalq ta’limi bo‘limi sobiq boshlig‘i qurilish-ta’mirlash ishlari davomida jami 1,7 milliard so‘m miqdordagi mablag‘larni talon-toroj qilgani va davlat manfaatlariga juda ko‘p miqdorda zarar yetkazgani aniqlangan. Shu sabab, 1-noyabr kuni u gumonlanuvchi tariqasida protsessual tartibda ushlangan.

Xabarga ko‘ra, ayni paytda tergov harakatlari davom etmoqda.