Тошкентда Сенатнинг янги биноси жойлашган кўчадан ўтувчи 10 та автобус 3 ноябрдан 4 ноябрь соат 11:00 га қадар ўз йўналишини ўзгартиради. Бу ҳақда «Тошшаҳартрансхизмат» матбуот хизмати хабар берди.
Маълум қилинишича, Тошкентдаги Ислом Каримов кўчасининг Шароф Рашидов кўчаси кесишмасидан Амир Темур шоҳкўчаси кесишмасигача бўлган қисмида йўл таъмирлаш ишлари олиб борилаётгани сабабли, 3 ноябрдан 4 ноябрь соат 11:00 га қадар транспорт ҳаракати учун ёпилади.
Шу муносабат билан, 1, 13, 19, 21, 22, 30, 37, 51, 67, 85-сонли автобус йўналишлари суратдаги кўчалардан ҳаракатини давом эттиради.
Эслатиб ўтамиз, Тошкент шаҳридаги Ислом Каримов кўчасининг бир қисми бир неча кун кетма-кет тиғиз вақтда огоҳлантиришсиз ёпиб қўйилаётган эди. Бунинг оқибатида бир неча кун Марказий универмаг (ЦУМ), Алишер Навоий номидаги Давлат академик катта театри, Сенатнинг янги биноси ва Beeline офиси яқинида куннинг тиғиз вақтида катта тирбандлик юзага келди.
Шундан сўнг Тошкент шаҳар ҳокимлиги ушбу кўчанинг бир қисми ёпилиши ҳақида расмий хабар берди. Унда йўл таъмирлаш ва ободонлаштириш ишлари олиб борилиши муносабати билан 3 ноябрь куни соат 00:00 дан 4 ноябрь куни соат 11:00 га қадар Ислом Каримов кўчасининг Шароф Рашидов кўчаси кесишмасидан Амир Темур шоҳкўчаси кесишмасигача бўлган қисми транспорт ҳаракатланиши учун ёпилиши маълум қилиниб, ҳайдовчилардан айланма йўллардан фойдаланишлари тавсия қилинган ва юзага келган ноқулайлик учун узр сўралган.
Изоҳ (0)