O‘zbekistonda 2021-yilning 9 oyi davomida banklar tomonidan 41 932 nafar jismoniy shaxsga ipoteka krediti ajratildi. Bu haqda Markaziy bank ma’lumotlariga tayanib, Spot xabar berdi.
Ma’lum bo‘lishicha, shu vaqt ichida berilgan ipoteka kreditlarining umumiy hajmi 6,1 trillion so‘mni tashkil etib, o‘tgan yilning shu davriga nisbatan 4,8 foizga kamaygan.
Ushbu mablag‘larning 80 foizi yoki 4,89 trillion so‘m birlamchi bozorda uy-joy sotib olish uchun berilgan kreditlarga to‘g‘ri keladi. Ko‘rsatkich o‘tgan yilgiga nisbatan 28,7 foizga pastlagan. Kredit mablag‘larining 20 foizi yoki 1,25 trillion so‘m ikkilamchi bozordan uy-joy sotib olish uchun berilgan. Bu 2020-yilning 9 oyidagiga nisbatan 8,6 barobarga ko‘p.
Qayd etilishicha, ikkilamchi bozordan uy-joy sotib olish uchun berilgan kreditlarning asosiy qismi “O‘zbekiston ipotekani qayta moliyalashtirish kompaniyasi” AJ mablag‘lari hisobidan ajratilgan – 1,208 trillion so‘m.
2020-yil fevral oyida joriy etilgan yangi davlat dasturi bo‘yicha ipoteka kreditlariga talab ham sezilarli darajada oshgan. Yanvar—sentabr oylarida 2,86 trillion so‘m muomalaga chiqarilgan. Bu o‘tgan yilning shu davriga nisbatan 3,6 barobar ko‘p.
Ta’kidlanishicha, 2021-yil boshidan beri berilgan ipoteka kreditlari umumiy hajmining 26,8 foizi Toshkent shahriga to‘g‘ri kelgan — 1,64 trillion so‘m. Keyingi o‘rinlarda Samarqand (585 milliard so‘m) va Farg‘ona (570 milliard so‘m) viloyatlari qayd etilgan.
Bundan tashqari, ipoteka kreditlari qoldig‘i 1-oktabr holatiga ko‘ra, o‘tgan yilning shu davriga nisbatan 26,2 foizga oshib, 32,8 trillion so‘mni tashkil etgan.
Mavzuga doir:
Izoh (0)