3-noyabr kuni Rossiyaning Irkutsk viloyatiga qo‘nmoqchi bo‘lgan An-12 yuk tashuvchi samolyoti radarlardan g‘oyib bo‘ldi. Samolyot bortida yetti kishi bo‘lgan, deb yozadi Meduza Rossiya Favqulodda vaziyatlar vazirligiga tayanib.
Qutqaruvchilar Irkutskdan 7 kilometr uzoqlikdagi Pivovarixa aholi punkti yaqinidan samolyot qulagan joyni topdi. Halokatdan keyin An-12 yonib ketgan. Hodisa joyida 300 kvadrat metr maydonga yoqilg‘i to‘kilgan. Dastlabki ma’lumotlarga ko‘ra, An-12 bortida bo‘lganlarning barchasi halok bo‘lgan.
“Yetti kishi halok bo‘lgan. Yerga urilgandan so‘ng samolyot alanga ichida qolgan. Odamlar yong‘inda halok bo‘lgan”, — dedi “Interfaks”ning voqeadan xabardor manbasi.
Manbaga ko‘ra, halokat joyida yong‘in o‘chirilgandan so‘ng besh kishining jasadi topilgan, ekspertizasiz ularning shaxsini aniqlashning iloji yo‘q. Bortdagi yana ikki kishining jasadini qidirish ishlari davom etmoqda.
Favqulodda vaziyatlar vazirligi matbuot xizmatining qayd etishicha, qutqaruvchilar samolyot qulagan joydagi ochiq yong‘inni to‘liq bartaraf qilgan.
Samolyot Yakutsk—Irkutsk yo‘nalishi bo‘ylab parvoz qilayotgan bo‘lgan. “RBK” xabariga ko‘ra, samolyot Belarusning “Grodno” aviakompaniyasiga tegishli. Qayd etilishicha, ekipaj tarkibida Belarus, Rossiya va Ukraina fuqarolari bo‘lgan.
Voqea sabablari orasida ekipajning xatosi yoki texnik nosozlik ko‘rib chiqilmoqda.
Eslatib o‘tamiz, 12-sentabr kuni Irkutskdan muntazam parvozni amalga oshirayotgan L-410 yo‘lovchi samolyoti Kazachinskoye qishlog‘idan 4 km uzoqlikda qo‘nish paytida qulab tushgandi. Oqibatda to‘rt kishi, shu jumladan, uchuvchi halok bo‘lgan.
12-avgustda esa Rossiyaning Kamchatka o‘lkasida sayyohlarni olib ketayotgan Mi-8 vertolyoti ko‘lga qulab tushgandi. Mi-8 bortida 16 kishi bo‘lgan, ulardan 8 nafari bedarak yo‘qolgan.
Shuningdek, 6-iyul kuni Rossiyaning Petropavlovsk—Kamchatskiy shahridan Palana posyolkasiga yo‘lovchi parvozini amalga oshirayotgan An-26 samolyoti dengizga qulagan edi. Samolyot bortida 28 kishi bo‘lgan. Halokatdan so‘ng Rossiyada uch kunlik motam e’lon qilingandi. Dastlab qutqaruvchilar samolyot qulab tushishi oqibatida halok bo‘lgan olti kishining jasadini topishga muvaffaq bo‘lgan, ular suvdan chiqarib olingan. 9-iyul kuni An-26 samolyotidagi barcha yo‘lovchilar va ekipaj a’zolarining jasadi topilgan.
Izoh (0)