Efiopiya hukumati mamlakatda olti oy muddatga favqulodda holat rejimini e’lon qildi. Bu haqda mamlakat hukumatining jamoatchilik bilan aloqalar xizmati boshlig‘i Legess Tulu hamda adliya vaziri va bosh prokuror Gideon Timotios ma’lum qildi, deb xabar beradi Tengrinews.
Reuters’ning yozishicha, e’lon mamlakat bosh vaziri Abiy Ahmed fuqarolarni “Tigray ozodligi xalq fronti”dan himoyalash uchun qo‘liga qurol olishga chaqirganidan ikki kun o‘tib bildirilgan.
Ma’lumotlarga ko‘ra, ushbu chora poytaxt Addis-Abeba shimolidagi Tigray mintaqasi bilan chegara yaqinida joylashgan Amxara viloyatidagi Dessiye va Kombolcha shaharlari atrofidagi vaziyat bilan bog‘liq.
“Mamlakatimiz o‘z mavjudligi, suvereniteti va birdamligi borasida jiddiy xavf qarshisida turibdi. Va biz bu xavfni oddiy huquqni muhofaza qilish tizimlari va tartiblari orqali bartaraf eta olmaymiz”, — deydi adliya vaziri Gideon Timotios.
Uning aytishicha, favqulodda holatda har qanday qonunbuzarga, xususan, “terrorchilik guruhlari”ni moliyalashtirish, moddiy va ma’naviy yordam ko‘rsatganlar 3 yildan 10 yilgacha qamaladi.
Addis-Abeba shahri administratsiyasining ma’lum qilishicha, odamlar o‘z qurollari ro‘yxatdan o‘tkazishi va o‘z tumanlarida to‘planishi lozim. Uylarda tintuvlar o‘tkazilmoqda va tartibbuzarlar hibsga olinyapti.
“Aholi o‘z tumanlarida to‘planishi va o‘z hududini qo‘riqlashi mumkin. Quroli bor, lekin qo‘riqlash ishlarida ishtirok eta olmaydiganlarga qurollarini hukumatga yoki yaqin qarindoshlari yoki do‘stlariga topshirish tavsiya etiladi”, — deyiladi hukumat xabarida.
Efiopiya hukumati va Tigray mintaqasidagi hukmron “Tigray ozodligi xalq fronti” partiyasi (TPLF) o‘rtasidagi qurolli mojaro 2020-yilning 4-noyabrda yuzaga kelgan. Bunga Efiopiya hukumatining TPLF mamlakat qurolli kuchlarining harbiy bazasiga hujum uyushtirganlik haqidagi ayblovi sabab bo‘lgandi.
Izoh (0)