Rossiya tarkibiga kiruvchi Tatariston Respublikasining Menzelinsk shahrida mahalliy aeroklubga tegishli bo‘lgan L-410 yengil motorli samolyoti qulab tushdi. Bu haqda “TASS” shoshilinch xizmatlarga tayanib xabar berdi.
Samolyot bortida 23 kishi bo‘lgan. Yetti kishi omon qolgan, ular samolyot bo‘laklari ostidan qutqarib olingan, deb yozadi “Interfaks” Favqulodda vaziyatlar vazirligiga tayanib. Qolgan 16 kishi, shu jumladan, ikkala uchuvchi ham halok bo‘lgan, deb ma’lum qildi “RIA Novosti” manbasi.
“TASS” manbasiga ko‘ra, samolyot aerodromdan uchib chiqqanidan keyin darhol qulagan. Qulash chog‘ida uning fyuzelyaji (korpusi) chilparchin bo‘lgan. “Interfaks” manbasi qayd etishicha, halokatning asosiy sababi sifatida texnikaning ishlamay qolgani ko‘rib chiqilmoqda.
Dastlabki ma’lumotlarga ko‘ra, parvoz chog‘ida samolyot boshqaruvi ishlamay qolgan, uchuvchi majburiy qo‘nishni amalga oshirmoqchi bo‘lgan, ammo yerga juda kuchli zarb bilan urilgan.
Shu bilan birga, “TASS” manbasi avariyaga samolyotga haddan ortiq yuk tushgani ehtimoliy sabab bo‘lganini aytmoqda.
Halokatga uchragan samolyot, tasdiqlanmagan ma’lumotlarga ko‘ra, DOSAAF (Rossiya armiyasi, aviatsiyasi va flotiga ko‘mak berish ko‘ngillilar jamiyati)ga tegishli bo‘lgan. U 1987-yildan buyon ishlatilib kelingan.
Mavzuga doir:
- Rossiyaning Xabarovsk o‘lkasida g‘oyib bo‘lgan samolyot bo‘laklari qo‘riqxonadan topildi. Ekipaj a’zolarining hammasi halok bo‘lgan
- Rossiyaning Irkutsk viloyatida samolyot qulab tushdi, 4 kishi halok bo‘ldi
- Rossiyaning Kamchatka o‘lkasida sayyohlarni olib ketayotgan vertolyot ko‘lga qulab tushdi. 8 kishi bedarak yo‘qoldi