Nigeriyaning Lagos shahrida 21 qavatli binoning qulashi oqibatida kamida 20 kishi halok bo‘lgan. Bu haqda 3-noyabr kuni The Punch nashri xabar berdi.
O‘tgan kechada favqulodda xizmatlar Lagosdagi hodisa qurbonlarining soni 20 kishiga yetganini tasdiqladi. Ayni vaqtda to‘qqiz kishi vayronalar ostidan tirik holda olib chiqilgan. Ulardan uch nafari uyiga, qolganlari kasalxonaga yetkazilgan.
O‘z navbatida halok bo‘lganlardan ba’zilarining oila a’zolari qutqaruv operatsiyasi sekin olib borilayotganidan shikoyat qildi – ular odamlarni qidirish ishlarida ishtirok etishga ruxsat talab qildi. Shuningdek, topilgan jasadlarning qarindoshlariga ularni tanib olish uchun uzoq vaqt davomida ruxsat berilmagani aytilmoqda. Ta’kidlash joizki, avariya xizmatlari qulash oqibatlarini bartaraf etishda beton va metall qirquvchi ekskavatorlardan foydalanmoqda.
Eslatib o‘tamiz, Nigeriyadagi ushbu yangi qurilayotgan 21 qavatli bino 1-noyabr kuni qulab tushgandi. Guvohlarning ma’lum qilishicha, bino qulagan vaqtda u yerda 100 ga yaqin quruvchi ishlayotgan bo‘lgan, hozirda ular bedarak yo‘qolgan deb hisoblanmoqda.
Avvalroq Gruziyaning Batumi shahrida 5 qavatli uy qulab tushgani, Floridada 12 qavatli turar joy qulab tushishi oqibatida 99 kishi bedarak yo‘qolgani to‘g‘risida xabar berilgandi.
Izoh (0)