Россияда Ан-12 самолёти ҳалокатга учради. Бортдаги 7 кишининг ҳаммаси ҳалок бўлган

3 ноябрь куни Россиянинг Иркутск вилоятига қўнмоқчи бўлган Ан-12 юк ташувчи самолёти радарлардан ғойиб бўлди. Самолёт бортида етти киши бўлган, деб ёзади Meduza Россия Фавқулодда вазиятлар вазирлигига таяниб.

Қутқарувчилар Иркутскдан 7 километр узоқликдаги Пивовариха аҳоли пункти яқинидан самолёт қулаган жойни топди. Ҳалокатдан кейин Ан-12 ёниб кетган. Ҳодиса жойида 300 квадрат метр майдонга ёқилғи тўкилган. Дастлабки маълумотларга кўра, Ан-12 бортида бўлганларнинг барчаси ҳалок бўлган.

«Етти киши ҳалок бўлган. Ерга урилгандан сўнг самолёт аланга ичида қолган. Одамлар ёнғинда ҳалок бўлган», — деди «Интерфакс»нинг воқеадан хабардор манбаси.

Манбага кўра, ҳалокат жойида ёнғин ўчирилгандан сўнг беш кишининг жасади топилган, экспертизасиз уларнинг шахсини аниқлашнинг иложи йўқ. Бортдаги яна икки кишининг жасадини қидириш ишлари давом этмоқда.

Фавқулодда вазиятлар вазирлиги матбуот хизматининг қайд этишича, қутқарувчилар самолёт қулаган жойдаги очиқ ёнғинни тўлиқ бартараф қилган.

Самолёт Якутск—Иркутск йўналиши бўйлаб парвоз қилаётган бўлган. «РБК» хабарига кўра, самолёт Беларуснинг «Гродно» авиакомпаниясига тегишли. Қайд этилишича, экипаж таркибида Беларусь, Россия ва Украина фуқаролари бўлган.

Воқеа сабаблари орасида экипажнинг хатоси ёки техник носозлик кўриб чиқилмоқда.

Эслатиб ўтамиз, 12 сентябрь куни Иркутскдан мунтазам парвозни амалга ошираётган Л-410 йўловчи самолёти Казачинское қишлоғидан 4 км узоқликда қўниш пайтида қулаб тушганди. Оқибатда тўрт киши, шу жумладан, учувчи ҳалок бўлган.

12 августда эса Россиянинг Камчатка ўлкасида сайёҳларни олиб кетаётган Ми-8 вертолёти кўлга қулаб тушганди. Ми-8 бортида 16 киши бўлган, улардан 8 нафари бедарак йўқолган.

Шунингдек, 6 июль куни Россиянинг Петропавловск—Камчацкий шаҳридан Палана посёлкасига йўловчи парвозини амалга ошираётган Ан-26 самолёти денгизга қулаган эди. Самолёт бортида 28 киши бўлган. Ҳалокатдан сўнг Россияда уч кунлик мотам эълон қилинганди. Дастлаб қутқарувчилар самолёт қулаб тушиши оқибатида ҳалок бўлган олти кишининг жасадини топишга муваффақ бўлган, улар сувдан чиқариб олинган. 9 июль куни Ан-26 самолётидаги барча йўловчилар ва экипаж аъзоларининг жасади топилган.