Turkmaniston prezidenti Gurbanguli Berdimuhamedov 1-noyabr kuni ayrim bosh vazir o‘rinbosarlari, viloyatlar va poytaxt hokimlari bilan ishchi yig‘ilish o‘tkazdi, deb xabar beradi “Xronika Turkmenistana”.
Ashxobod hokimi Rahim Gandimov va bosh vazirning qurilish, sanoat va energetika komplekslari bo‘yicha o‘rinbosari Charimurat Purchekov poytaxtdagi obodonlashtirish ishlari, olib borilayotgan qurilishlar va qishki mavsumga tayyorgarlik borasida ma’lumot bergan.
Berdimuhamedov qish mavsumi yaqinlashayotgani sabab hokimga poytaxtda issiqlik, suv, energetika va gaz ta’minoti uzluksiz ishlashini ta’minlash, shuningdek, kommunal xizmatlar va tozalikni saqlash uchun mo‘ljallangan uskunalardan samarali foydalanish borasidagi masalalarini nazoratga olish vazifasini qo‘ygan.
Viloyatlar rahbarlari va bosh vaziri o‘rinbosari, agrosanoat kompleksi masalalari bo‘yicha mas’ul Esenmurat Orazgeldiyev kuzgi g‘alla ekish ishlari yakunlangani, shuningdek, paxta yig‘im-terim kampaniyasining o‘tkazilishi to‘g‘risida hisobot bergan.
Gurbanguli Berdimuhamedov paxta yig‘im-terimi muddatlaridan norozi bo‘lib, viloyatlarning ayrim tumanlarida oq oltinni yig‘ishtirib olish darajasi past ekanini ta’kidlagan. Prezident paxtani o‘z vaqtida, sifatli terib olish uchun barcha kuch va resurslarni yo‘naltirishni buyurgan.
Shuningdek, mutasaddilarga 6-noyabrga rejalashtirilgan kuzgi daraxt ekish ishlariga tayyorgarlik ko‘rish, ko‘chatlarni ekish joylarini va sonini aniqlash topshirilgan. Mamlakatda ko‘kalamzorlashtirish kampaniyasi davomida 15 million tup ko‘chat ekilishi kutilmoqda.
Esenmurat Orazgeldiyevga alohida Hosil bayramini yuqori darajada o‘tkazish bo‘yicha tadbir rejasini tayyorlash topshirilgan.
Avvalroq Turkmaniston prezidenti koma holatiga tushgani haqidagi xabarlar rad etilgani, Berdimuhamedov yangi avtotrassaning bir qismini ochib berib, unda yangi “KamAZ”ni sinovdan o‘tkazgani to‘g‘risida xabar berilgandi.
Izoh (0)