Turkmanistonda 2020-yilning yozida koronavirus haqida she’r yozgan 48 yoshli YouTube blogeri Murat Ovezov besh yilga qamaldi. Bu haqda “Xronika Turkmenistana” xabar berdi.
Ovezov Turkmaniston Jinoyat kodeksining 228-moddasi “firibgarlik” bo‘yicha sudlangan, biroq Turkmennews nashri manbalari ish qo‘zg‘atilishiga haqiqiy sabab sifatida uning YouTube’dagi chiqishlarini keltirmoqda.
Toshhovuz viloyatining Gubadog‘ tumanida yashovchi Ovezov o‘z kanalida mamlakatda sodir bo‘layotgan voqealar – do‘konlardagi navbatlar, internetga kirishdagi qiyinchiliklar, shuningdek, koronavirus bilan bog‘liq vaziyat va bu borada kiritilgan cheklovlar haqida aytib bergan.
Murat Ovezov 2020-yil 12-iyunda o‘zining birinchi videolavhasida pandemiya haqida gapirgan va koronavirus to‘g‘risidagi “Achchiq haqiqat” she’rini o‘qib bergan.
Erkak tarmoq marketingi bilan shug‘ullangani sababli o‘z kanali orqali foydalilik darajasi shubha ostida bo‘lgan ayrim biologik faol qo‘shimchalarni ham reklama qilgan.
Ammo Turkmennews’ning fikricha, aynan mamlakatda sodir bo‘layotgan voqealar haqidagi videosi bu odamga nisbatan jinoiy ish qo‘zg‘atilishiga asl sabab bo‘lgan.
Eslatib o‘tamiz, 2-mart kuni turkmanistonlik talaba Ro‘zgeldi Cho‘liyev Moskvaning Sheremetyevo aeroportida hibsga olingandi. U internetda hukumatni tanqid qilgani uchun Turkmaniston maxsus xizmatlari tomonidan ta’qib qilinayotgan edi. Cho‘liyev internetda bir necha bor Turkmaniston prezidentini tanqid qilib, video joylashtirgan.
Izoh (0)