Грузиядаги маҳаллий ҳокимият учун сайловларда 20 та муниципалитетдан фақат биттасида мухолифатчи партия вакили ғалаба қозонди

Грузия Марказий Сайлов комиссияси маҳаллий ҳокимият учун сайловларнинг 30 октябрь, шанба куни бўлиб ўтган иккинчи босқичида овоз бериш натижаларини санаб чиқишни якунлади. 20 та муниципалитетдан 19 тасида, жумладан, ўзини ўзи бошқарадиган бешта йирик шаҳар – Тбилиси, Кутаиси, Батуми, Поти ва Руставида ҳукмрон «Грузия орзуси» партияси номзодлари ғалаба қозонди.

Биргина Грузия ғарбидаги Цаленжиха муниципалитетида мухолифатчи «Ягона миллий ҳаракат» (ЯМҲ) партиясидан номзод Гиоргий Харчилава сайловларда ғалаба қозонди.

Норасмий раҳбари Грузиянинг собиқ президенти Михаил Саакашвили ҳисобланадиган ЯМҲ партияси етакчилари якшанбага ўтар кечаси маҳаллий сайловларнинг иккинчи босқичи натижаларини тан олмасликларини маълум қилди, уларнинг фикрича, натижалар ҳукумат томонидан сохталаштирилган.

«Грузияда сайловлар бекор қилинди. Уларни олигарх Бидзин Иванишвили шароитида ўтказиб бўлмайди. Эртага биз амалдаги тузумга қарши муросасиз бўладиган курашнинг аниқ режасини тақдим этамиз», — деди ЯМҲ раиси, Тбилиси мэрлигига номзод Никoнор Мелия.

Аввалроқ Рустави шаҳри мэрлигига номзод, «ЯМҲ» партияси етакчиларидан бири Давид Киркитадзе ҳам унинг партияси «ҳукумат томонидан сохталаштирилган» сайловларнинг иккинчи босқичи натижаларини тан олмаслигини айтганди.

«Биз зўравонлар томонидан бизга қўйилган сайлов натижаларини қабул қилмаймиз ва тегишли чораларни кўрамиз, жумладан, кескин норозилик билдирамиз. Ҳукуматнинг бундай зўравонлик ҳаракати ҳеч қачон демократик сайлов сифатида тан олинмайди. Биз курашиш ниятидамиз», — деган Киркитадзе.

Унинг сўзларига кўра, «Ягона миллий ҳаракат» партияси яқин орада «кураш усуллари ва стратегиялари, жумладан, ҳукуматга бўйсунмаслик ва кўча ҳаракатлари» ҳақида ҳисобот беради.

Грузия МСКнинг дастлабки маълумотларига кўра, Киркитадзе Руставидаги сайловларда 7 фоизлик фарқ билан ҳукмрон партия номзоди Нино Лацабидзега ютқазган.

«ЯМҲ»нинг яна бир етакчиси Гиоргий Барамидзе мухолифатчи «Пирвели ТВ» телеканали эфирида мухолифат «тинч инқилоб»ни бошлаётганини айтди.

«Душанба кунидан (1 ноябрь) қаттиқ норозилик ва ҳукуматга фуқаролар итоатсизлиги бошланади. Биз ҳар бир шаҳарда давлат муассасалари олдида чодирлар қурамиз. Ҳар куни норозилик намойишлари бўлади. Буларнинг барчаси халққа қарши бўлган ҳукумат сиёсий саҳнани тарк этмагунча давом этади», — деди Барамидзе.

У Рустави қамоқхонасида сақланаётган Саакашвилини очликни тўхтатиб, ҳозирги Грузия ҳукуматига қарши курашга қўшилишга чақирди.