Kelajakda Yer yuzida insoniyat nazorat qila olmaydigan xavfli virus paydo bo‘ladi. Bu haqda JSST rahbari Tedros Gebreyesus G20 davlatlarining moliya va sog‘liqni saqlash vazirlarining Rimda o‘tkazilgan yig‘ilishida ma’lum qildi, deb xabar beradi “Korrespondent.net”.
Uning so‘zlariga ko‘ra, Yerda tarqalishini to‘xtatib bo‘lmaydigan yana bir virusning paydo bo‘lishi “biologiya nuqtayi nazaridan shubhasiz” hisoblanadi.
“Ushbu pandemiyani tugatsak ham, biz u bergan darsdan xulosa chiqarishimiz va keyingisiga tayyorlanishimiz kerak. Biologiya nuqtayi nazaridan qaysidir onda biz shunchaki ushlab tura olmaydigan virusning paydo bo‘lishi shubhasiz”, — deya ta’kidlaydi u.
Gebreyesus, shuningdek, “yuqori darajadagi xavflar”ga qarshi kurashda “yuqori darajadagi siyosiy ishtirok” zarurligini ta’kidlagan.
U G20 uchrashuvi ishtirokchilarini pandemiyaga tayyorgarlik ko‘rish va unga qarshi kurashish bo‘yicha yuridik jihatdan majburiyat yuklovchi xalqaro shartnomani tuzishni qo‘llab-quvvatlashga chaqirgan. Bu boradagi tegishli qarorni noyabr oyida o‘tkaziladigan Jahon sog‘liqni saqlash assambleyasining maxsus sessiyasida qabul qilish rejalashtirilmoqda.
JSST rahbari, shuningdek, dunyoda vaksinalardan foydalanishda tenglik yo‘qligiga e’tibor qaratib, hozirda virusga qarshi sayyora aholisining 36 foizi to‘liq emlangani, Afrikada esa ushbu ko‘rsatkich “atigi 6 foiz” ekanini eslatib o‘tgan.
JSSTning 29-oktabr holatidagi ma’lumotlariga ko‘ra, pandemiya boshlanganidan buyon yer yuzida 245 milliondan ortiq odam koronavirusga chalingan va 4,97 milliondan ortiq odam uning qurboniga aylangan.
Avvalroq Gebreyesus insoniyatning virus ustidan g‘alaba qozonishga barcha imkoniyatlari mavjudligi, ammo dunyo ushbu vositalardan yaxshi foydalana olmayotganini ma’lum qilgandi. Oktabr boshlarida esa BMT Bosh assambleyasining rahbari 2023-yilgacha dunyo aholisini COVID-19 ga qarshi emlashga erishish zarurligini aytgan edi.
Izoh (0)