Qashqadaryo viloyatining Dehqonobod tumanida yashovchi otaxon Fayzulla bobo 30 yildan beri tumandagi “Miyona” masjidida istiqomat qilib kelayotgani ma’lum bo‘ldi. Bu haqda “Daryo” muxbiri xabar berdi.
“Bu masjidni rahmatli Nasrulla akam 1991-yil iyun oyida xalqdan pul yig‘ib, o‘zi qurgan. Shundan beri shu masjidda yashayman. Otamning ismi Abduqahhor xatib edi. Men 25 yoshimda qamalib ketgandim. Stalin zamoni edi. 1952-yil avgust oyida juma kuni qamoqqa olib ketishgandi. Shundan so‘ng Rossiyaga borib, qorli kunlarda majburan ishlatishdi. Kasal bo‘lib, olti oy shifoxonada yotdim. Stalin 1953-yil mart oyida vafot etgach, keyingi podsho zamonida qamoqdan chiqdim va yurtimga qaytdim. Biroq kasal bo‘lib qolganim bois og‘ir ishga yaramadim. Shu sabab qorovullik qildim”, — deydi “Daryo” muxbiri bilan suhbatlashgan Fayzulla bobo.
Fayzulla boboning aytishicha, u dastlabki diniy ta’limotini otasi Abduqahhor xatibdan olgan. Undan so‘ng esa akasidan ta’lim olgan.
“Masjidda 1991-yil iyun oyidan beri yashayman. Ammo muhtojlikdan emas, albatta. Alloh dargohida bo‘lishni istayman. O‘tgan davr mobaynida masjidimiz juda xaroba edi. Yaxshi odamlar pul yig‘ishib, ta’mirlashdi”, — deydi Fayzulla bobo.
2013-yildan beri Fayzulla bobo bilan birga namoz o‘qishni odat qilgan 82 yoshli Temir bobo Hojiqulovning aytishicha, Fayzulla boboning islom olamida dong‘i ketgan.
“Quvonarlisi, boboning yoniga islom davlatlaridan ham din peshvolari ko‘p kelishadi. Haj safarini niyat qilgan insonlar avval boboni ziyorat qilib, so‘ngra hajga otlanishadi. Asosan vodiy viloyatlaridan, Surxondaryodan, Toshkent shahridan yo‘qlab kelishadi. Bobo haqida eshitgan inson borki, nega masjidda yashaydi, uyi yo‘qmi, degan savolni berishadi. Aslida, otaxonning sakkiz nafar farzandi bor. O‘zi ham pulga muhtoj emas. Taqvodor inson bo‘lgani uchun ham Alloh dargohi bo‘lmish — masjidda yashashni afzal bilgan”, — deydi Vazirlar Mahkamasi tarkibidagi Din ishlari bo‘yicha qo‘mitaning tuman bo‘yicha bosh mutaxassisi Oybek Normurodov.
“Miyona” masjidi imom xatibi Tolib Mahmarayimovning aytishicha, Fayzulla bobo taqvodor inson. U haftaning har dushanbasi va payshanbasida ro‘za tutadi.
Hududda istiqomat qiluvchi mahalliy aholining ayrimlariga ko‘ra, Fayzulla boboni yo‘qlab hatto Checheniston rahbari Ramzon Qodirovning odamlari ham kelishar ekan. Ammo bu ma’lumotni ko‘pchilik ham tasdiqlamadi.
Izoh (0)