2023-yil 1-yanvardan normativ-huquqiy hujjatlar loyihalari vazirlik, idoralar bilan kelishishdan oldin lingvistik ekspertizadan o‘tkaziladi. Ekspertizalarni o‘tkazish tartiblari O‘zbekiston hukumatining 28-oktabrdagi qarori bilan tasdiqlandi, deb xabar beradi Telegram’dagi “Huquqiy axborot” kanali.
Lingvistik ekspertiza loyihani ishlab chiqqan tashkilot rahbarining maslahatchisi tomonidan quyidagi talablar asosida o‘tkaziladi:
- jumlalarning soddaligi va qisqaligi, ta’riflarning aniqligi;
- imlo, uslubiy, grammatik va orfografiya qoidalariga mosligi;
- yangi atamalar, shuningdek, soha atamalarining to‘g‘ri qo‘llanilganligi;
- so‘z birikmalarining o‘zaro to‘g‘ri bog‘langanligi;
- bayonning tizimliligi va ifodali ketma-ketligi.
Shunga ko‘ra, loyiha matni qayta ishlanib, kelishish uchun vazirlik va idoralarga yuboriladi.
Loyihada quyidagilarning qo‘llanilishiga yo‘l qo‘yilmaydi:
- og‘zaki nutq shakllari;
- davlat tilida teng ma’noli so‘zlar va tushunchalar mavjud bo‘lgan taqdirda, chet tillari atamalari;
- eskirgan hamda ko‘p ma’noni anglatadigan so‘zlar va iboralar, majoziy taqqoslashlar, sifatlashlar, kinoyalar;
- abbreviatura va qisqartmalar (umumiy qabul qilingan abbreviatura va qisqartmalar bundan mustasno).
Izoh (0)