Қашқадарё вилоятининг Деҳқонобод туманида яшовчи отахон Файзулла бобо 30 йилдан бери тумандаги «Миёна» масжидида истиқомат қилиб келаётгани маълум бўлди. Бу ҳақда «Дарё» мухбири хабар берди.
«Бу масжидни раҳматли Насрулла акам 1991 йил июнь ойида халқдан пул йиғиб, ўзи қурган. Шундан бери шу масжидда яшайман. Отамнинг исми Абдуқаҳҳор хатиб эди. Мен 25 ёшимда қамалиб кетгандим. Сталин замони эди. 1952 йил август ойида жума куни қамоққа олиб кетишганди. Шундан сўнг Россияга бориб, қорли кунларда мажбуран ишлатишди. Касал бўлиб, олти ой шифохонада ётдим. Сталин 1953 йил март ойида вафот этгач, кейинги подшо замонида қамоқдан чиқдим ва юртимга қайтдим. Бироқ касал бўлиб қолганим боис оғир ишга ярамадим. Шу сабаб қоровуллик қилдим», — дейди «Дарё» мухбири билан суҳбатлашган Файзулла бобо.
Файзулла бобонинг айтишича, у дастлабки диний таълимотини отаси Абдуқаҳҳор хатибдан олган. Ундан сўнг эса акасидан таълим олган.
«Масжидда 1991 йил июнь ойидан бери яшайман. Аммо муҳтожликдан эмас, албатта. Аллоҳ даргоҳида бўлишни истайман. Ўтган давр мобайнида масжидимиз жуда хароба эди. Яхши одамлар пул йиғишиб, таъмирлашди», — дейди Файзулла бобо.
2013 йилдан бери Файзулла бобо билан бирга намоз ўқишни одат қилган 82 ёшли Темир бобо Ҳожиқуловнинг айтишича, Файзулла бобонинг ислом оламида донғи кетган.
«Қувонарлиси, бобонинг ёнига ислом давлатларидан ҳам дин пешволари кўп келишади. Ҳаж сафарини ният қилган инсонлар аввал бобони зиёрат қилиб, сўнгра ҳажга отланишади. Асосан водий вилоятларидан, Сурхондарёдан, Тошкент шаҳридан йўқлаб келишади. Бобо ҳақида эшитган инсон борки, нега масжидда яшайди, уйи йўқми, деган саволни беришади. Аслида, отахоннинг саккиз нафар фарзанди бор. Ўзи ҳам пулга муҳтож эмас. Тақводор инсон бўлгани учун ҳам Аллоҳ даргоҳи бўлмиш — масжидда яшашни афзал билган», — дейди Вазирлар Маҳкамаси таркибидаги Дин ишлари бўйича қўмитанинг туман бўйича бош мутахассиси Ойбек Нормуродов.
«Миёна» масжиди имом хатиби Толиб Маҳмарайимовнинг айтишича, Файзулла бобо тақводор инсон. У ҳафтанинг ҳар душанбаси ва пайшанбасида рўза тутади.
Ҳудудда истиқомат қилувчи маҳаллий аҳолининг айримларига кўра, Файзулла бобони йўқлаб ҳатто Чеченистон раҳбари Рамзон Қодировнинг одамлари ҳам келишар экан. Аммо бу маълумотни кўпчилик ҳам тасдиқламади.
Изоҳ (0)