Zarafshon daryosining “Navoiyazot” yaqinidagi hududida ommaviy zaharlanish yuzaga kelib, baliqlar nobud bo‘lgandi. Navoiy viloyati prokuraturasi holat yuzasidan jinoyat ishi qo‘zg‘atilganini ma’lum qildi.
Qayd etilishicha, ushbu holat bo‘yicha viloyat prokuraturasi tomonidan tegishli soha mutaxassislari jalb qilingan holda keng qamrovli tekshiruv o‘tkazildi. Bu jarayonda sanoat korxonalaridan Zarafshon daryosiga oqizilgan chiqindi suvlar tarkibi va nobud bo‘lgan baliqlarda maxsus laboratoriya va ekspertiza tahlillari o‘tkazilib, tegishli xulosalar olindi va boshqa holatlar atroflicha o‘rganildi.
Tekshiruv natijalari Zarafshon daryosiga azot ammoniy, nitrit va boshqa kimyoviy moddalar me’yoridan ortiqcha miqdorda oqizilgani sababli daryodagi ko‘plab baliqlar nobud bo‘lganini ko‘rsatdi.
Mazkur holat yuzasidan viloyat prokuraturasi tomonidan 28-oktabr kuni Jinoyat kodeksining 196-moddasi (atrof tabiiy muhitni ifloslantirish) 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Eslatib o‘tamiz, Navoiy viloyati Ekologiya va atrof-muhitni muhofaza qilish boshqarmasi inspektorlari o‘z faoliyatini olib borishda Zarafshon daryosining Karmana tumanidan oqib o‘tuvchi qismi suvining rangi biroz o‘zgargani, baliqlar nobud bo‘layotganiga jiddiy e’tibor qaratib, bu holatning sababini o‘rgangandi.
O‘rganish davomida boshqarmaning Analitik laboratoriya mas’ul xodimlari, Karmana tumani Ekologiya inspeksiyasi davlat inspektorlari, viloyat Veterinariya laboratoriyasi va “Navoiyazot”ning sanitar laboratoriyasi mutaxassislari hamkorligida daryoning 5 ta nuqtasidan tahlil namunalari olindi.
Natijada “Navoiyazot”ga qarashli (1-tashlama) 267-quduqdan azot ammoniy 21 marotaba, azot nitrat 2,6 marotaba, azot nitrit 60 marotaba, xloridlar 1,3 marotaba, mis ionlari 2,1 marotaba belgilangan me’yorlardan yuqoriligi hamda daryoda ommaviy zaharlanish yuzaga kelgani aniqlandi.
O‘zbekiston Ekologik partiyasi holatga munosabat bildirib, Vazirlar Mahkamasining 2020-yil 7-sentabrdagi “Atrof-muhitga ta’sirni baholash mexanizmini yanada takomillashtirish to‘g‘risida”gi qaroriga ko‘ra, “Navoiyazot” atrof-muhitga ta’sir ko‘rsatishning I toifasi, ya’ni yuqori darajadagi xavfli obyektlar qatoriga kirishini ma’lum qildi.
“Atrof-muhitga xavf darajasi yuqori bo‘lgan bu korxonadan bunchalik ko‘p miqdorda xavfli kimyoviy moddalarning ochiq tabiatga chiqarib yuborilishi birinchi galda qo‘pol qonunbuzarlik va shu bilan birga, korxona tomonidan atrof-muhit muhofazasiga e’tiborsizlikning yaqqol ko‘rinishidir”, — deyiladi partiya munosabatida.
“Navoiyazot” Zarafshon daryosida ko‘plab baliqlar nobud bo‘lishiga olib kelgan zaharli oqova suvlari chiqarilganini rad etib, bunda boshqa ishlab chiqarish komplekslari, shu jumladan, baliqchilik xo‘jaliklarini aybladi.
Izoh (0)