Автомобиль йўллари қўмитаси раиси Абдураҳмон Абдувалиев Сенатда яқин 3 йил ичида Ўзбекистондаги барча тупроқ йўллар асфальтланиши, 4 йилдан сўнг эса таъмирталаб йўллар қолмаслигини маълум қилди.
«Президент топшириғи бўйича катта лойиҳа ишлаб чиқилган. Бунда 121 минг километр йўл 2016 йил 1 январь ҳолатига кўра ёмон аҳволда эди. Лекин ажратилган маблағлар ҳисобидан 56 700 километр йўл 5 йил давомида таъмирланди. Ҳозирда 64 мингдан ортиқроқ йўл таъмирталаб аҳволда, шундан умумий фойдаланишдаги йўллар 5 100 километр, қолгани ишчи хўжалик йўллари.
2021 йил 1 январь ҳолатига кўра, 31 400 километр тупроқ йўл бор эди. Ажратилган маблағлар ҳисобидан 11 400 километр йўл шағал қилинди, 5 минг километрдан ортқи ички хўжалик йўллари асфальтланди.
Президент топшириғи асосида ишлаб чиқилган лойиҳага кўра, ушбу (тупроқ — таҳр.) йўллар йўқ қилинади. 3 йил давомида, Худо хоҳласа, тупроқ йўллар Ўзбекистонда бўлмайди. Қолган йўлларнинг барчасини 4 йил давомида тўлиқ таъмирланади. Шундан сўнг графикка тушиб олиб, шу график бўйича ишларни амалга оширамиз.
Шунингдек, 5 йил давомида 1 500 тада ошиқ кўприк таъмирланган бўлса, 2021 йилнинг ўзида 300 тадан ортиқ кўприк таъмирланади. Бугунги кунда 229 та кўприк таъмирланмоқда», – дейди Абдураҳмон Абдувалиев.
Изоҳ (0)