Kubok yarim finaliga yo‘l olgan “ajdarlar”, JChni g‘alaba boshlagan Shahobiddin va Sulsherning jamoada qolishini xohlayotgan Ronaldu. Eng so‘nggi sport yangiliklari

Dunyo va o‘zbek sportiga oid 29-oktabr kunining eng muhim xabarlari dayjesti bilan tanishing.

O‘zbekiston

O‘zbekiston Kubogi 1/4 finalidan o‘rin olgan o‘yinda “Nasaf” va “So‘g‘diyona” o‘zaro to‘qnash keldi. Bellashuvda Qarshi klubining 1:0 hisobida qo‘li baland keldi va yarim finalga yo‘l oldi.

Shu tariqa 1/2finalga yo‘l olgan barcha jamoalar nomi aniq bo‘ldi:

Amaldagi jahon chempioni Shahobiddin Zoirov serbiyalik bokschini mag‘lub etdi

Serbiyaning Belgrad shahrida boks bo‘yicha JCh—2021 bahslarining 29-noyabr kungi bahslari o‘tkazilmoqda.

-52 kg vazn toifasida amaldagi Jahon chempioni Shahobiddin Zoirov serbiyalik Tamir Galanovga qarshi ringga ko‘tarildi. Uchala raundda ustunlikka erishgan Zoirov raqibini 5:0 hisobida yengdi va keyingi bosqich yo‘llanmasini hal qildi.

-92 kg vaznda Madiyor Saidrahimov belaruslik Vladislav Smyaglikovni mag‘lub etib, musobaqaning keyingi bosqichiga yo‘l oldi.

Shuningdek, 29-noyabr kuni Abdumalik Halokov va Shahram G‘iyosov ham musobaqadagi ilk jangini o‘tkazadi.

Jahon

Krishtianu Ronaldu “Liverpul”dan uchralgan 0:5 hisobidagi mag‘lubiyatdan keyin “Manchester Yunayted” futbolchilarini Ole-Gunnar Sulsherni  qo‘llab-quvvatlashga chaqirdi.

Manchester Evening News’ning yozishicha, portugaliyalik o‘z jamoadoshlarini iste’foga chiqarilish ehtimoli bo‘lgan Sulsherni klubda olib qolmoqchi. U futbolchilarni birlashtirishga harakat qilmoqda.

“Inter” Kristian Eriksenni sotishga tayyor, unga Italiyada futbol o‘ynash mumkin emas

Yevro—2020 da yurak to‘xtashini boshdan kechirgan daniyalik futbolchi “Inter”ni tark etishi mumkin, deb yozmoqda Football Italia.

Avvalroq “Inter” 29 yoshli futbolchi Italiya qonunlariga ko‘ra, professional futbol bilan shug‘ullana olmasligini va shu sabab mavsum qaydnomasiga kiritilmaganini ma’lum qilgandi.

Futbolchiga kardioverter-defibrillyator o‘rnatilgan, ushbu moslama bilan futbol o‘ynash Italiyada taqiqlangan. Shu sabab milanliklar uni boshqa mamlakat klubiga sotib yuborishga tayyor.

Xavi “Barselona” boshqaruvidagi ilk o‘yinini qachon o‘tkazishi aniq bo‘ldi

Qatarning “As-Sadd” klubi bosh murabbiyi Xavining “Barselona”ni boshqarishi kutilmoqda.

Jurnalist Ramon Salmurriga ko‘ra, ispaniyalik mutaxassis La Liga doirasida 6-noyabr kuni bo‘lib o‘tadigan “Selta”ga qarshi o‘yinda katalon klubida murabbiy sifatida debyut qiladi.

“Selta”ga qarshi o‘yingacha “Barselona” “Alaves” (La Liga) va “Dinamo K” (Chempionlar Ligasi) bilan bahs yuritishi kerak.

Ronalduning egizak farzand kutayotgani haqidagi posti Instagram’da 27 mln layk yig‘di

“Manchester Yunayted” hujumchisi Krishtianu Ronalduning Instagram’dagi egizak farzand kutayotgani haqidagi posti sportga oid postlar orasida eng ko‘p layk yig‘di.

28-oktabr kuni Ronaldu va qaylig‘i Jorjino Rodriges bilan egizak farzand kutayotganini e’lon qilgandi. 29-oktabr sanasi 19:00 holatiga ko‘ra ushbu post 27 milliondan ortiq layk yig‘gan.

Bungacha Instagram’da sportga oid postlar ichida eng ko‘p layk yig‘gan rasm Lionel Messiga tegishli edi. Uning oilasi qurshovida “PSJ” libosidagi posti 22 millionta layk yig‘gan.