Dunyo va o‘zbek sportiga oid 28-oktabr kunining eng muhim xabarlari dayjesti bilan tanishing.
O‘zbekiston
Amaldagi jahon chempioni Mirazizbek Mirzaxalilov amerikalik bokschiga mag‘lub bo‘ldi
Serbiyaning Belgrad shahrida boks bo‘yicha JCh—2021 bahslarining 4-kunidan o‘rin olgan bahslar o‘tkazilmoqda.
-57 kg vazn toifasida amaldagi jahon chempioni Mirazizbek Mirzaxalilov amerikalik Jamal Harviga qarshi ringga ko‘tarilib, 2:3 hisobida mag‘lubiyatga uchradi. Amaldagi jahon chempioni bo‘lgan Mirazizbek musobaqa bilan xayrlashdi.
+92 kg vaznda harakat qiladigan Lazizbek Mullajonov esa eronlik Amiri Puriani 4:1 hisobida mag‘lub etdi va keyingi bosqich yo‘llanmasini hal qildi.
-67 kg vazn toifasida harakat qiladigan Asadxo‘ja Mo‘ydinxo‘jayev falastinlik Ahmed Xararaga qarshi ringga ko‘tarildi va 5:0 hisobida g‘alaba qozondi. Shu tariqa Mo‘ydinxo‘jayev 1/8 finalga yo‘llanmani qo‘lga kiritdi.
“Bunyodkor” va “OKMK” O‘zbekiston Kubogining yarim finaliga yo‘llanmani qo‘lga kiritdi
O‘zbekiston Kubogi 1/4 finalidan o‘rin olgan o‘yinlar 28-oktabr kuni bo‘lib o‘tdi. Unda “OKMK” so‘nggi daqiqalarda urilgan gol evaziga “Qizilqum”ni yengdi. “Bunyodkor” esa “Surxon”dan ustun keldi.
Jahon
Ronaldu va Jorjina Rodriges egizak farzand kutmoqda
“Manchester Yunayted” hujumchisi Krishtianu Ronaldu va uning qaylig‘i Jorjina Rodriges egizak farzand kutayotganini ma’lum qildi.
“Biz egizak farzand kutayotganimizni e’lon qilishdan xursandman. Qalbimiz mehrga to‘la. Sizlar bilan uchrashishni intiqlik bilan kutamiz”, — deb yozadi Ronaldu Instagram sahifasida.
Ronaldu bir necha yildan beri Rodriges bilan birga hayot kechiradi. Ularning 3 yoshli Alana Martina ismli qiz farzandi bor. Shuningdek, Rodriges Ronalduning surrogat onadan tug‘ilgan uch nafar farzandiga ham onalik qiladi.
Lautaro Martines “Inter” bilan shartnomasini uzaytirdi
Hujumchi Lautaro Martines “Inter” bilan 2026-yilning iyuniga qadar mo‘ljallangan yangi shartnomaga imzo chekdi.
Taniqli insayder Fabrisio Romanoning yozishicha, hujumchining “Inter” bilan avvalgi shartnomasida 111 million yevro miqdorida tovon puli belgilangan edi. Yangi bitimda esa tovon puli miqdori ko‘rsatilmagan.
Fatining jarohati jiddiy bo‘lib chiqmadi
“Barselona” yarim himoyachisi Ansu Fatining jarohati jiddiy bo‘lib chiqmadi, deb xabar qilmoqda As.
Qayd etilishicha, 18 yoshli futbolchining jarohati jarrohlik amaliyotini talab qilmaydi. Qayta tiklanish uchun esa unga 7—10 kun kerak bo‘ladi.
Avvalroq Fatining tizzasidagi og‘riq tufayli noma’lum muddatga safdan chiqqani haqida xabar berilgandi.
Xavi “Barselona”ni boshqarishga rozi bo‘ldi
Qatarning “As-Sadd” klubi bosh murabbiyi Xavi “Barselona”ni boshqarishga rozi bo‘lgan. Biroq kelishuvni amalga oshirishda bir qator to‘sqinliklar bo‘lishi mumkin.
Diario Sport’ga ko‘ra, hozirda katalon klubi “As-Sadd” bilan Xavining shartnomasini bekor qilish borasida ish olib bormoqda. Shartnomada mutaxassisning tovon puli 1 million yevro etib belgilangan.
Avvalroq RAC1 ham Xavining “Barselona”ga rozilik berganini tasdiqlagandi. Xavining noyabr oyidagi FIFA kunlaridan keyin o‘z shtabi bilan jamoa boshqaruvini o‘z qo‘liga olishi kutilmoqda.
Ungacha esa jamoa bosh murabbiyi vazifasini vaqtinchalik Serxi Barxuan bajarib turadi.
“Barselona” Kumanni iste’foga chiqargani uchun unga 12 million yevro to‘lab beradi
“Barselona” Ronald Kumanni iste’foga chiqargani uchun niderlandiyalik mutaxassisga katta miqdorda kompensatsiya to‘laydi.
El Pais xabariga ko‘ra, 58 yoshli Kumanga 12 million yevro to‘lanishi kerak.
Eslatib o‘tamiz, Kuman La Liga doirasida “Rayo Valyekano”dan uchralgan mag‘lubiyatdan so‘ng o‘z lavozimidan ozod etilgandi.
“Bavariya” 43 yil avvalgi antirekordini takrorladi
“Bavariya” Germaniya Kubogi 1/16 doirasida “Borussiya M”ga mag‘lub bo‘ldi (0:5).
Bu Myunxen klubi uchun musobaqa tarixidagi eng yirik mag‘lubiyat bo‘ldi. Shuningdek, bu “Bavariya” uchun barcha musobaqalarda 1978-yildan keyingi eng yirik mag‘lubiyat hisoblanadi. Jamoa o‘shanda “Fortuna”ga 1:7 hisobida mag‘lub bo‘lgandi. Shundan keyin “Bavariya” biror marta ham 5 yoki undan ko‘p gol farqi bilan mag‘lubiyatga uchramagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)