Xitoy tashqi ishlar vaziri Van I AQSh va boshqa g‘arb davlatlarini Afg‘onistonga nisbatan kiritilgan bir tomonlama sanksiyalarini imkon qadar tezroq bekor qilishga chaqirdi. Bu haqda u Afg‘onistonga qo‘shni davlatlar vazirlarining Tehronda bo‘lib o‘tgan ikkinchi yig‘ilishida videoaloqa orqali ishtirokida aytib o‘tdi.
“Biz AQSh va g‘arb davlatlarini Afg‘onistonning qiyinchiliklardan yangi hayotga o‘tishiga yordam berish bo‘yicha o‘zlarining ustuvor majburiyatlarini bajarishga undashimiz zarur. Boshqa ko‘plab narsalar qatorida ular hozir Afg‘onistonga qarshi bir tomonlama sanksiyalarini bekor qilishi kerak, toki uning davlat aktivlaridan aholi ehtiyojlarini qondirish uchun imkon qadar tezroq foydalanish imkoni bo‘lsin”, — dedi Van I.
U Birlashgan Millatlar Tashkiloti (BMT) va Shanxay hamkorlik tashkiloti (ShHT) negizida Afg‘onistonda terrorizmga qarshi kurashning ko‘p tomonlama mexanizmlarini yaratishga chaqirdi.
“Biz terrorizmga qarshi kurashda Afg‘oniston bilan ikki tomonlama va ko‘p tomonlama muloqot hamda hamkorlikni yo‘lga qo‘yishga qulay bo‘lgan vaqtga ijobiy qarashimiz kerak. BMT va ShHT kabi ko‘p tomonli platformalar orqali terrorizmga qarshi yagona front yaratish zarur”, — dedi u.
Afg‘onistonga qo‘shni davlatlarining birinchi uchrashuvi 8-sentabr kuni onlayn tarzda bo‘lib o‘tgandi. Hozirgi tadbir davomida tomonlar Afg‘onistonda barcha etnik guruhlar ishtirokida inklyuziv hukumatni shakllantirishga qanday hissa qo‘shish borasida o‘z sa’y-harakatlarini yo‘naltirishni rejalashtirmoqda. Tadbirda Eron va Xitoydan tashqari O‘zbekiston, Tojikiston, Turkmaniston, Pokiston va Rossiya vakillari ishtirok etmoqda.
Yig‘ilishda qatnashgan Rossiya tashqi ishlar vaziri Sergey Lavrov Afg‘onistonga qo‘shni davlatlarni o‘z hududiga AQSh va NATO qo‘shinlarining joylashishiga yo‘l qo‘ymaslikka chaqirdi.
“Biz Afg‘onistonga qo‘shni davlatlarni o‘z hududida afg‘on tuprog‘ini tark etib, u yerga ko‘chib o‘tishni rejalashtirayotgan AQSh va NATO kuchlarining bo‘lishiga yo‘l qo‘ymaslikka chaqiramiz”, — dedi Rossiya vakili.
Mavzuga doir:
Izoh (0)