Qirg‘iziston Milliy xavfsizlik davlat qo‘mitasi (GKNB) xodimlari respublika qishloq, suv xo‘jaligi va hududiy rivojlanish vazirining amaldagi o‘rinbosari Marsbek Ilich o‘g‘li, shuningdek, sobiq o‘rinbosari Amangeldi Isayevni qo‘lga oldi. Ularning ikkalasi ham vaqtinchalik saqlash izolyatoriga joylashtirildi, deb yozadi “Kommersant” GKNB matbuot xizmatiga tayanib.
GKNB ma’lumotlariga ko‘ra, qo‘lga olinganlar ayrim kompaniyalar bilan til biriktirib, mamlakatdan qishloq xo‘jaligi mahsulotlarining eksport qilinishiga sun’iy to‘siqlar yaratganlikda gumon qilinmoqda.
Tazabek agentligining aniqlik kiritishicha, qishloq xo‘jaligi mahsulotlarini Yevroosiyo iqtisodiy ittifoqi mamlakatlariga yetkazib berishda korrupsiya holatlarini aniqlash bo‘yicha tergov harakatlari olib borilmoqda.
Sentabr oyida Qirg‘iziston sobiq bosh vaziri Jo‘mart Otorboyev Qirg‘izistonda Qumtor konini qazishda “Qumtor koni bosh rejasining atrof-muhitga ta’sirini baholash jarayonida atrof-muhitni muhofaza qilish davlat agentligi komissiyasiga bosim o‘tkazganlikda” ayblanib hibsga olingandi.
Bundan avval Qirg‘iziston sobiq bosh vazirlari Temir Sariyev va Omurbek Babanov Qumtor ishi bo‘yicha hibsga olingandi. Shuningdek, Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar iyul oyi boshlarida Qumtor ishi bo‘yicha xalqaro qidiruvga berilgan. Asqar Akayev 2-avgust kuni Qirg‘izistonga qaytdi. U yo‘l qo‘ygan xatolari uchun hamda “Qumtor” loyihasini amalga oshirish chog‘ida umidlarni oqlamagani uchun qirg‘iz xalqidan uzr so‘radi. Qirg‘iziston sobiq prezidenti Qumtor ishi bo‘yicha Milliy xavfsizlik davlat qo‘mitasida so‘roq qilinganidan keyin mamlakatni yana tark etdi.
May oyi oxirida Qirg‘izistonda yana ikki nafar sobiq davlat amaldori korrupsiyada ayblanib hibsga olingan. Ulardan biri Qirg‘iziston parlamentining sobiq raisi va sobiq prezident So‘ronbay Jeenbekovning ukasi Asilbek Jeenbekovdir.
Izoh (0)