Хитой ташқи ишлар вазири Ван И АҚШ ва бошқа ғарб давлатларини Афғонистонга нисбатан киритилган бир томонлама санкцияларини имкон қадар тезроқ бекор қилишга чақирди. Бу ҳақда у Афғонистонга қўшни давлатлар вазирларининг Теҳронда бўлиб ўтган иккинчи йиғилишида видеоалоқа орқали иштирокида айтиб ўтди.
«Биз АҚШ ва ғарб давлатларини Афғонистоннинг қийинчиликлардан янги ҳаётга ўтишига ёрдам бериш бўйича ўзларининг устувор мажбуриятларини бажаришга ундашимиз зарур. Бошқа кўплаб нарсалар қаторида улар ҳозир Афғонистонга қарши бир томонлама санкцияларини бекор қилиши керак, токи унинг давлат активларидан аҳоли эҳтиёжларини қондириш учун имкон қадар тезроқ фойдаланиш имкони бўлсин», — деди Ван И.
У Бирлашган Миллатлар Ташкилоти (БМТ) ва Шанхай ҳамкорлик ташкилоти (ШҲТ) негизида Афғонистонда терроризмга қарши курашнинг кўп томонлама механизмларини яратишга чақирди.
«Биз терроризмга қарши курашда Афғонистон билан икки томонлама ва кўп томонлама мулоқот ҳамда ҳамкорликни йўлга қўйишга қулай бўлган вақтга ижобий қарашимиз керак. БМТ ва ШҲТ каби кўп томонли платформалар орқали терроризмга қарши ягона фронт яратиш зарур», — деди у.
Афғонистонга қўшни давлатларининг биринчи учрашуви 8 сентябрь куни онлайн тарзда бўлиб ўтганди. Ҳозирги тадбир давомида томонлар Афғонистонда барча этник гуруҳлар иштирокида инклюзив ҳукуматни шакллантиришга қандай ҳисса қўшиш борасида ўз саъй-ҳаракатларини йўналтиришни режалаштирмоқда. Тадбирда Эрон ва Хитойдан ташқари Ўзбекистон, Тожикистон, Туркманистон, Покистон ва Россия вакиллари иштирок этмоқда.
Йиғилишда қатнашган Россия ташқи ишлар вазири Сергей Лавров Афғонистонга қўшни давлатларни ўз ҳудудига АҚШ ва НАТО қўшинларининг жойлашишига йўл қўймасликка чақирди.
«Биз Афғонистонга қўшни давлатларни ўз ҳудудида афғон тупроғини тарк этиб, у ерга кўчиб ўтишни режалаштираётган АҚШ ва НАТО кучларининг бўлишига йўл қўймасликка чақирамиз», — деди Россия вакили.
Мавзуга доир:
Изоҳ (0)