O‘zbekiston aholisi “Sputnik Layt” vaksinasi bilan emlanadi. Bu haqda Sanitariya-epidemiologik osoyishtalik va jamoat salomatligi xizmati boshlig‘i, bosh davlat sanitariya vrachi Bahodir Yusupaliyev “RIA Novosti”ga ma’lum qildi.
Ta’kidlanishicha, O‘zbekiston rasmiylari aholini koronavirusga qarshi “Sputnik Layt” bilan emlash foydali va qulay deb hisoblaydi. Shu sabab hukumat vaksinani mamlakatda qo‘llash niyatida.
“O‘zbekistonda ‘Sputnik Layt’dan foydalanishga tayyormiz. Men hech qanday to‘siq ko‘rmayapman”, — deydi Yusupaliyev.
Qayt etilishicha, sog‘liqni saqlash vaziri o‘rinbosari bir dozali vaksinalar juda qulay ekanini bildirgan.
“Menimcha, biz vaksinalar turini kengaytirishimiz kerak. Pandemiya hali ham davom etmoqda. Vaksinalar va ulardan foydalanish imkoniyati qancha ko‘p bo‘lsa, emlash tizimi shunchalik samarali ishlaydi”, — deya qo‘shimcha qildi u.
Eslatib o‘tamiz, Rossiyaga qurilish sohasida ishlash uchun yuboriladigan 10 ming nafar o‘zbekistonlik “Sputnik Layt” vaksinasi bilan emlanishi xabar qilingandi. Ularni mamlakat hududida tibbiy ko‘rikdan o‘tkazish uchun Rossiyaning 40 nafar tibbiyot xodimi O‘zbekistonga kelgan.
Ta’kidlanishicha, Rossiya Sog‘liqni saqlash vazirligi tomonidan mehnat migrantlarini emlash uchun yangi turdagi vaksinaning 12 ming dozasi olib kelingan. “Sputnik Layt” bir komponentli vaksina bo‘lib, to‘liq emlanish uchun vaksinaning bir dozasini olish kifoya qiladi.
Sentabr oyida O‘zbekistonning Jurabek Laboratories korxonasi “Sputnik V” vaksinasini seriyali ishlab chiqarishni o‘zlashtirgan, oktabr oyi o‘rtalarida preparat ichki bozorga chiqarilishi aytilgandi. Toshkent viloyatining Olmaliq shahrida joylashgan korxonada ishlab chiqarish quvvati dastlabki bosqichda oyiga 2 million preparatni tashkil etadi. Shuningdek, aprel oyidan boshlab “Sputnik V” Rossiyadan ham yetkazib berilmoqda.
O‘zbekistonda koronavirusga qarshi emlash tadbirlari 2021-yil 1-apreldan boshlangan. Shu kungacha vaksina olishi ko‘zda tutilgan aholining 60 foizi birinchi doza vaksinalarini olib ulgurgan. Hozirda COVID-19 ga qarshi emlanish uchun 6 turdagi vaksina olib kelingan. Bular: ZF-UZ-VAC2001, “Sputnik V”, Pfizer, Moderna, Sinovac va AstraZeneca hisoblanadi.