Ўзбекистон аҳолиси «Спутник Лайт» вакцинаси билан эмланади. Бу ҳақда Санитария-эпидемиологик осойишталик ва жамоат саломатлиги хизмати бошлиғи, бош давлат санитария врачи Баҳодир Юсупалиев «РИА Новости»га маълум қилди.
Таъкидланишича, Ўзбекистон расмийлари аҳолини коронавирусга қарши «Спутник Лайт» билан эмлаш фойдали ва қулай деб ҳисоблайди. Шу сабаб ҳукумат вакцинани мамлакатда қўллаш ниятида.
«Ўзбекистонда ‘Спутник Лайт’дан фойдаланишга тайёрмиз. Мен ҳеч қандай тўсиқ кўрмаяпман», — дейди Юсупалиев.
Қайт этилишича, соғлиқни сақлаш вазири ўринбосари бир дозали вакциналар жуда қулай эканини билдирган.
«Менимча, биз вакциналар турини кенгайтиришимиз керак. Пандемия ҳали ҳам давом этмоқда. Вакциналар ва улардан фойдаланиш имконияти қанча кўп бўлса, эмлаш тизими шунчалик самарали ишлайди», — дея қўшимча қилди у.
Эслатиб ўтамиз, Россияга қурилиш соҳасида ишлаш учун юбориладиган 10 минг нафар ўзбекистонлик «Спутник Лайт» вакцинаси билан эмланиши хабар қилинганди. Уларни мамлакат ҳудудида тиббий кўрикдан ўтказиш учун Россиянинг 40 нафар тиббиёт ходими Ўзбекистонга келган.
Таъкидланишича, Россия Соғлиқни сақлаш вазирлиги томонидан меҳнат мигрантларини эмлаш учун янги турдаги вакцинанинг 12 минг дозаси олиб келинган. «Спутник Лайт» бир компонентли вакцина бўлиб, тўлиқ эмланиш учун вакцинанинг бир дозасини олиш кифоя қилади.
Сентябрь ойида Ўзбекистоннинг Jurabek Laboratories корхонаси «Спутник V» вакцинасини серияли ишлаб чиқаришни ўзлаштирган, октябрь ойи ўрталарида препарат ички бозорга чиқарилиши айтилганди. Тошкент вилоятининг Олмалиқ шаҳрида жойлашган корхонада ишлаб чиқариш қуввати дастлабки босқичда ойига 2 миллион препаратни ташкил этади. Шунингдек, апрель ойидан бошлаб «Спутник V» Россиядан ҳам етказиб берилмоқда.
Ўзбекистонда коронавирусга қарши эмлаш тадбирлари 2021 йил 1 апрелдан бошланган. Шу кунгача вакцина олиши кўзда тутилган аҳолининг 60 фоизи биринчи доза вакциналарини олиб улгурган. Ҳозирда COVID-19 га қарши эмланиш учун 6 турдаги вакцина олиб келинган. Булар: ZF-UZ-VAC2001, «Спутник V», Pfizer, Moderna, Sinovac ва AstraZeneca ҳисобланади.
Изоҳ (0)