Mark Sukerberg “Facebook arxivi”ni kompaniyaga tuhmat qilishga urinish deb atadi

Facebook asoschisi Mark Sukerberg kompaniyaning ichki hujjatlariga asoslangan Facebook Papers (“Facebook arxivi”) haqida birinchi marta fikr bildirdi. Amerika OAVlarida e’lon qilinayotgan mazkur hujjatlarga ko‘ra, ijtimoiy tarmoq so‘z erkinligi va tenglik tamoyillarini e’tiborsiz qoldirgan. Dastlab kompaniya xodimlari bilan gaplashgan Sukerberg o‘z bayonotini Facebook sahifasiga joyladi.

“Men yirik tashkilotlarni sinchiklab tekshirish kerak deb hisoblayman, men ular bo‘lmagan jamiyatdan ko‘ra ular bor jamiyatda yashashni afzal ko‘raman. Yaxshi niyatda qilingan tanqid bizning takomillashishimizga yordam beradi. Ammo mening fikrimcha, biz ko‘rib turgan holat kompaniyamiz haqida noto‘g‘ri tasavvur berish uchun oshkor etilgan hujjatlarni tanlab qo‘llash uchun o‘zaro kelishib qilingan urinishdir”.

Sukerbergning ta’kidlashicha, kompaniya qarorlar qabul qilishda so‘z erkinligi va zararli kontentni kamaytirish, maxfiylikni shifrlash va huquq-tartibot organlarini qo‘llab-quvvatlash singari bir-biriga raqib ijtimoiy adolat tushunchalari o‘rtasida muvozanatni topishi kerak.

“Men bularga aniqlik kiritish uchun bir necha bor muayyan tartib-qoidalar o‘rnatishga chaqirdim, chunki kompaniyalar bunday qarorlarning ko‘pini mustaqil ravishda qabul qilmasligi kerak deb o‘ylayman”, — dedi Sukerberg.

Oktabr oyida AQShning 17 ta ommaviy axborot vositalari Facebook’ning ichki hujjatlariga asoslangan xabarlarni chop etdi. Kompaniyaning sobiq xodimi Frensis Xaugen jurnalistlarga topshirgan hujjatlarga ko‘ra, Facebook, xususan, nafrat keltirib chiqaradigan postlarni olib tashlamaydi, dezinformatsiyaga qarshi kurashda mavjud vositalardan foydalanmaydi va VIP foydalanuvchilarga kontentni moderatsiya qilish qoidalarini kengaytirmaydi.