Janubiy Koreya Respublikasining sobiq prezidenti Ro De U Seulda vafot etdi, deya xabar berdi uning yordamchilari Yonhap agentligiga. U 88 yoshda edi.
Sobiq prezident yaqinda sog‘lig‘i yomonlashgani sababli kasalxonaga yotqizilgan. Shifokorlar unga yordam bera olmadi. Ro De U 1988-yildan 1993-yilgacha mamlakat prezidenti bo‘lgan. U mamlakatning sobiq harbiy prezidenti Chon Du Xvandan keyin demokratik yo‘l bilan saylangan birinchi davlat rahbari edi.
1993-yilda Ro De U korrupsiyada ayblanib hibsga olingan, so‘ngra 1980-yilgi Kvanju namoyishlarini kuch bilan bostirishga bog‘liq holda vatanga xiyonatda ayblangan. 1996-yil avgust oyida Ro De U 22 yillik qamoq jazosiga hukm qilindi, keyinroq uning jazo muddati 17 yilga qisqartirildi, 1998-yilda esa u avf etildi.
9-oktabr kuni Eronning birinchi prezidenti Abulhasan Banisadr vafot etgandi. Sobiq siyosatchi 88 yoshda edi. Xabarga ko‘ra Banisadr Parijdagi Salpetri kasalxonasida uzoq davom etgan xastalik oqibatida vafot etgan.
Eslatib o‘tamiz, sentabr oyida Jazoirni 20 yil davomida boshqargan sobiq prezident Abdulaziz Buteflika vafot etgan. Aprel oyida esa Chad davlatining 30 yillik prezidenti isyonchilar bilan jangda halok bo‘lgan, shuningdek, AQSh sobiq vitse-prezidenti Uolter Mondeyl 93 yoshida vafot etgandi.