Saudiya Arabistoni valiahd shahzodasi Muhammad bin Salom mamlakat podshohi Abdulloh ibn Abdulaziz al-Saudni Rossiyadan olib kelinishi kerak bo‘lgan zaharlangan uzuk yordamida o‘ldirish imkoniyati haqida gapirgan. Bu haqda mamlakat razvedkasining yuqori martabali sobiq xodimi Saad al-Jabriy CBS telekanaliga bergan intervyusida ma’lum qildi, deb yozadi Meduza.
Uning so‘zlariga ko‘ra, 2014-yilda Muhammad bin Salom o‘zining amakivachchasi, o‘sha vaqtda Saudiya razvedkasi rahbari bo‘lgan Muhammad bin Naifga taxtni otasiga bo‘shatib berish uchun podshoh Abdullohni o‘ldirmoqchi ekani haqida aytgan.
“U ‘men podshoh Abdullohni o‘ldirmoqchiman’, dedi. Men Rossiyadan zaharli uzukni olaman. Qo‘lini siqsam kifoya va undan qutulamiz… Balki u shunchaki maqtangandir, biroq biz (Saudiya razvedkasidagilar — tahr.) buni jiddiy qabul qildik”, — deydi u.
Saad al-Jabriy o‘z so‘zlariga biror dalil keltira olmagan. Shu bilan birga, u Muhammad bin Salmon va Muhammad bin Naifning suhbati videosini ko‘rganini ma’lum qilgan. Uning so‘zlariga ko‘ra, videoyozuvning originali hamon saqlanadi, undan ikki nusxa ham olingan. U ushbu videolar qayerda saqlanishini bilishini ham aytgan.
Saudiya Arabistonining Vashingtondagi elchixonasi al-Jabriyni o‘zining “milliardlab dollarlik moliyaviy jinoyatlari”dan e’tiborni chalg‘itmoqchi bo‘lgan “obro‘siz davlat amaldori” deb atagan.
Saudiya Arabistoni podshohi Abdulloh ibn Abdulaziz al-Saud 2015-yili 90 yoshida vafot etgan. Taxtni uning o‘gay ukasi Salmon ibn Abdulaziz al-Saud egallagan.
2017-yilda yangi podshoh valiahdni almashtirgan — jiyani Muhammad bin Naif o‘rnini o‘g‘li Muhammad bin Salmon egallagan. Bin Niaf ham, shuningdek, ichki ishlar vaziri lavozimidan iste’foga chiqarilgan. 2020-yilda u hibsga olingan edi.
Saad al-Jabriy bin Naif qo‘l ostida ishlagan. Saudiya hukumatidagi lavozimidan ayrilgach, al-Jabriy Kanadadan boshpana olgan. Uning so‘zlariga ko‘ra, vatanida sakkiz nafar farzandidan ikkitasi va kuyovi hibsga olingan.
Izoh (0)