BMT Xavfsizlik kengashi 25-oktabrga o‘tar kechasi Sudanda harbiylar hukumat a’zolarini hibsga olgani bilan bog‘liq vaziyat bo‘yicha yopiq yig‘ilish o‘tkazadi. Bu haqda tashkilot bayonotiga tayanib, “TASS” xabar berdi.
“Sudandagi vaziyat va boshqa masalalar bo‘yicha yig‘ilish soat 16:00 da yopiq formatda o‘tkaziladi”, — deyiladi xabarda. Muhokama so‘rovi AQSh, Buyuk Britaniya, Fransiya, Irlandiya, Norvegiya va Estoniya tomonidan yuborilgan.
Sudandagi davlat to‘ntarishi sabab armiya generali Abdul Fattoh al-Burhon mamlakatda favqulodda holat e’lon qilib, ijroiya hokimiyati — hukumat va suveren kengashni tarqatib yubordi. “Kommersant”ning yozishicha, Sudan bo‘yicha xalqaro “uchlik” (AQSh, Buyuk Britaniya, Norvegiya) harbiylar tomonidan qo‘lga olingan bosh vazir Abdulla Xamdok va hukumatning boshqa a’zolarini ozod qilishga chaqirgan. Tomonlar mamlakatdagi mazkur davlat to‘ntarishini qoralab, uning ishtirokchilarining harakati 2019-yilgi inqilob g‘oyalariga qarshi ekanini bildirgan.
Sudan harbiylari 25-oktabrga o‘tar kechasi mamlakat muvaqqat hukumatining bir qator vazirlarini, jumladan, muvaqqat bosh vazir Abdulla Xamdokni hibsga oldi.
Sudanda harbiylar va fuqarolik kuchlari o‘rtasidagi munosabatlarda inqiroz bir necha haftadan beri davom etmoqda. Ziddiyatlarni muloqot orqali hal qilishga urinishlar kutilgan natijaga olib kelmagan, qarama-qarshi lagerlar o‘z tarafdorlarini ko‘chalarga olib chiqqan. Norozilik namoyishlari oqibatida yetti kishi halok bo‘lgan va yuzdan ortiq odam jarohat olgani aytilmoqda.
Sudan armiyasi Xartumdagi davlat teleradiostansiyasi binosini nazoratga olgan. Ko‘plab xodimlar hibsga olingan. Poytaxtda mobil aloqa va internet bloklangan.
Izoh (0)