Turkiyadagi 10 ta davlat elchilari yangi bayonot bilan chiqib, Vena konvensiyasining mamlakat ichki ishlariga aralashmaslik majburiyatini yuklagan moddasiga amal qilishlarini bildirdi, deb xabar beradi “RBK”. Shundan so‘ng Turkiya prezidenti Rajab Toyyib Erdo‘g‘on diplomatlar shu orqali “orqada qadam tashladi” va bundan keyin bayonot berishda ehtiyot bo‘ladi deb hisoblagan.
Avvalroq 10 ta mamlakat elchilari Rajab Toyyib Erdo‘g‘ondan turkiyalik huquq himoyachisi va jamoat arbobi Usmon Kavalani qamoqdan ozod etishga chaqirgan, bu esa diplomatik mojaroni yuzaga keltirgan edi. Turkiya prezidenti 10 ta yetakchi mamlakatlar elchilarini persona non grata deb e’lon qilishni buyurgan.
Turkiyadagi 10 ta diplomatik missiya rahbarlarining yangi bayonoti Twitter’ga joylashtirilgan. Bayonotda elchilar Diplomatik munosabatlar to‘g‘risidagi Vena konvensiyasining 41-moddasiga ko‘ra harakat qilishgani keltirilgan. Unda aytilishicha, diplomatik ishchilar “o‘zlari bo‘lgan davlatning qonunlari va qarorlarini hurmat qilishga majbur”.
“Shuningdek, ular ushbu mamlakatning ichki ishlariga aralashmaslik majburiyatini olgan”, — deyiladi konvensiyada.
18-oktabr kuni AQSh, Kanada, Germaniya, Fransiya, Finlyandiya, Daniya, Niderlandiya, Norvegiya, Shvetsiya va Yangi Zelandiya elchixonalari Turkiyada to‘rt yil avval hibsga olingan Usmon Kavalaning ozod etilishini talab qilib murojaat qilgandi. Ular Turkiya hukumatini Inson huquqlari bo‘yicha Yevropa sudi talabini bajarishga va Kavalani qo‘yib yuborishga chaqirgan.
Murojaat chop etilgach, elchilar Turkiya Tashqi ishlar vazirligiga chaqirilgan va u yerda mamlakat ichki ishlariga aralashishga urinishda ayblangan. Erdo‘g‘on elchilarni Turkiyadan chiqarib yuborishi mumkinligi haqida ogohlantirgan.
Elchilarning yangi bayonotidan so‘ng Erdo‘g‘on ularga bu “dars bo‘lganini” ma’lum qildi. “Vena konvensiyasining 41-moddasiga ko‘ra, o‘z majburiyatlarini bajargan ushbu elchilar bundan keyin bayonotlariga ehtiyot bo‘ladi deb o‘ylaymiz”, — deydi Turkiya prezidenti.
Uning fikricha, bu diplomatik missiyalar rahbarlarining “mamlakatga nisbatan qilingan tuhmatdan bir qadam ortga chekingan”. Prezidentning qo‘shimcha qilishicha, Turkiya “mustaqilligini hurmat qilmagan” har qanday kishi mamlakatda qola olmaydi.
“Turkiya sud tizimi hech kimdan buyruq olmaydi. Davlat rahbari sifatida mening vazifam bizning sudyalarimizga nisbatan amalga oshirilgan ushbu hurmatsizlikka javob qaytarish etdi”, — deydi Erdo‘g‘on.
Asli Parijda tug‘ilgan filantrop va jamiyat faoli, 64 yoshli Usmon Kavala 2017-yil noyabr oyida hibsga olingan. U Istanbuldagi Gezi bog‘i atrofidagi ommaviy namoyishlarda ishtirok etganlikda va 2016-yilda davlat to‘ntarishiga uringanlikda ayblangan. Kavalaga qo‘yilgan ayblovlar bir necha bor ko‘rib chiqilgan, biroq u hanuz hibsda qolmoqda.
Yevropa sudi 2019-yilda Turkiya huquq-tartibot idoralarida Kavalani hibsda ushlab turish uchun salmoqli dalillar yo‘qligi haqida qaror chiqargan. Turkiya hukumati sudning qarorini bajarmadi.
Usmon Kavala fuqarolik jamiyatini rivojlantirishga qaratilgan loyihalarda faol ishtirok etgan. Xususan, u Turkiyada Soros “Ochiq jamiyat” fondining faoliyatini tashkil qilgan.
Izoh (0)