Misrda 2017-yildan beri birinchi marta favqulodda holat bekor qilindi. Bu haqda Misr prezidenti Abdulfattoh as-Sisiga tayanib, “Korrespondent.net” xabar berdi.

“Misr o‘zining buyuk xalqi va sodiq odamlari tufayli mintaqada xavfsizlik va barqarorlik vohasiga aylandi, shuning uchun men ko‘p yillar davomida birinchi marta favqulodda holat rejimini davom ettirishni bekor qilishga qaror qildim”, — dedi prezident.

Misrda favqulodda holat 2017-yilning aprelida ibodatxonalarga qilingan hujumlardan so‘ng e’lon qilingan edi. O‘shandan beri mamlakatda har uch oyda bir favqulodda vaziyat muntazam davom ettirilgan.

Fevral oyida Misr prezidenti tug‘ilish darajasining yuqoriligi mamlakatdagi asosiy muammolardan biri ekanini aytgandi.

“Sizga o‘zingiz boqolmaydigan va ish topib berolmaydigan bola nimaga kerak? Shuning uchun ham aholining 50 foizi kulbalarda yashaydi”, — degan davlat rahbari.

Shuningdek, u aholi sonining ko‘payishi milliy xavfsizlik masalasi ekanligini ta’kidlagan. Unga ko‘ra, agar vaziyat o‘zgarmasa va aholining yillik o‘sish darajasi 2,4 milliondan 400 ming kishiga kamaymasa, fuqarolar uchun hayot sifatini yaxshilashga qaratilgan milliy loyihalarning hech qanday ta’siri sezilmaydi.