Suriya hukumati 2020-yilda qasddan o‘rmon yong‘inlarini yuzaga keltirish aybi bilan sudlangan 24 kishini qatl etganini ma’lum qildi. Bu haqda BBC News’ga tayanib, “Interfaks” xabar berdi.
Mamlakat Adliya vazirligining ma’lum qilishicha, yana 11 kishi umrbod qamoq jazosiga hukm etilgan, voyaga yetmagan besh nafar fuqaroga 10—12 yil muddatga qamoq jazosi tayinlangan. Bayonotda yong‘inlar “terrorchilik akti” deya toifalangan.
Ular 2020-yilning sentabr va oktabr oylarida mamlakatdagi urush orqali bosib olingan tog‘li hududlarda yong‘in chiqarganini tan olgani aytilmoqda. Mazkur yong‘inlar oqibatida uch kishi halok bo‘lgan.
Mahalliy hukumat Latakiya, Tartus, Xoms va Xama provinsiyalarini qamrab olgan jami 187 ta o‘rmon yong‘inlarini qayd etgan bo‘lib, u 280 ta shahar va qishloqlarga shikast yetkazgan. Yong‘inlar qishloq xo‘jaligi uchun yaroqli 13 ming gektar yer va 11 ming gektar o‘rmonni kulga aylantirgan.
Eslatib o‘tamiz, 2019-yilning oktabrida Suriyada kuchli o‘rmon yong‘inlari kuzatilgan edi. O‘shanda o‘rmonlar yong‘inining asosiy o‘choqlari mamlakat shimoli-g‘arbidagi Homse, Tartus va Latakiya viloyatlarida ekani qayd etilgan. O‘rmonlar yonishini o‘chirish uchun u yerga janubiy provinsiya o‘t o‘chiruvchilari yuborilgan. Tartus viloyatining o‘zida yong‘inning 55 o‘chog‘i borligi aniqlangan va ularning hammasi aholi yashovchi hududlardan uzoqda joylashgan.
Izoh (0)